Alǵys kúni bir top aqmolalyq «Birlik» qoǵamdyq medalimen marapattaldy
KÓKShETAÝ. QazAqparat - Kókshetaýda 1 naýryz Alǵys aıtý kúnine jáne Qazaqstan halqy Aqmola Assambleıasynyń «Meniń otbasym - elimniń bir bólshegi» almanahynyń tusaýkeserine arnalǵan merekelik shara ótti, dep habarlaıdy «QazAqparat» HAA tilshisi.
Qoǵamdyq kelisim men halyqtyń birligin nyǵaıtý, jalpyulttyq ıdeıanyń qujattyq túri bolyp tabylatyn «Máńgilik el» patrıottyq aktisin nasıhattaý maqsatynda uıymdastyrylǵan is-sharaǵa memlekettik organdardyń, eńbek ujymdarynyń, etno-mádenı ortalyqtar men birlestikterdiń ókilderi, eńbek ardagerleri jáne «Meniń otbasym - elimniń bir bólshegi» jobasyna qatysýshylar, úlgili, yntymaǵy men birligi jarasqan otbasylar qatysty.
«Alǵys aıtý kúni - tarıhta oryn alǵan zorlyq-zombylyq, qýǵyn-súrgin oqıǵalarynyń nátıjesinde Qazaqstanǵa qonys aýdarylǵan túrli ulttyń mıllıondaǵan ókilderin qushaq jaıa qarsy alǵan qazaq halqyna degen sheksiz rızashylyq, bizdiń eldiń barlyq azamattarynyń bir-birine degen syılastyǵy, ortaq tarıhymyzdy qurmetteý, ózara kómek pen qoldaý kúni», dedi oblys ákiminiń orynbasary Nurlan Nurkenov quttyqtaý sózinde.
Shara barysynda el birligin nyǵaıtýǵa, mádenıetaralyq qarym-qatynasty damytýǵa, qazaqstandyq patrıotızmdi qalyptastyrýǵa qosqan eleýli úlesteri úshin Qazaqstan halqy Assambleıasynyń «Birlik» qoǵamdyq altyn medalimen «Qazaq zaǵıptar qoǵamy» qoǵamdyq birlestigi Bulandy korporatıvtik qorynyń prezıdenti,jetimder úıinen 39 balany baýyryna basyp, óz qamqorlyǵyna alǵan Serik Ákimbaev, Aqmola oblysynyń orys qaýymdastyǵynyń janyndaǵy «Rýsskaıa pesnıa» halyqtyq ansambiliniń jetekshisi Zoıa Avılova jáne Jarqaıyń aýdanyndaǵy «Ararat» armıan mádenı ortalyǵynyń tóraǵasy, Qazaqstan halqy Aqmola Assambleıasynyń múshesi Gachık Grıgorıan marapattaldy.
Sondaı-aq, respýblıkalyq beıbitshilik pen kelisim festıvaline belsendi qatysyp, joǵary kásibı sheberlik tanytqan Aqan seri atyndaǵy mádenıet kolledjiniń «Samotsvety» bı ansambliniń jetekshisi Andreı Pogorelyı men «Qoǵamdyq kelisim» mekemesiniń janyndaǵy «Etno» bı ujymynyń jetekshisi Irına Lobanova Qazaqstan Respýblıkasy Mádenıet jáne sport mınıstrliginiń Alǵys hatymen marapattaldy.
«Meniń otbasym - elimniń bir bólshegi» atty almanahpen Qazaqstan halqy Aqmola Assambleıasynyń hatshysy Maral Jaqypova tanystyryp, jınaqqa engen 25 úlgili, berekeli otbasylarǵa toqtaldy, jobaǵa qatysqan jýrnalısterge, týyndynyń keıipkerlerine alǵysyn bildirdi.
