Alǵys aıtý kúnine oraı aqmolalyqtarǵa qurt úlestirilýde

KÓKShETAÝ. QazAqparat - Alǵys aıtý kúni qarsańynda Kókshetaý qalasynda «Alǵys aıtamyn» aktsııasy bastaldy, dep habarlaıdy QazAqparat tilshisi.

Atalmysh shara – dostyqqa, toleranttylyqqa, barlyq adamdarǵa qurmet kórsetýge tárbıeleıdi jáne aqmolalyqtar arasynda tanymal bolyp keledi. Munyń mańyzdylyǵyn jas urpaq ta túsinedi. Mereke qarsańynda oblys ortalyǵynda Alǵys aıtý kúnine arnalǵan «Alǵys aıtamyn» aktsııasy bastaldy.

Oblystyq ishki saıasat basqarmasynyń málimetinshe, aktsııany «Assambleıa jastary» respýblıkalyq qoǵamdyq birlestiginiń Aqmola oblysy boıynsha ókildigi oblystyq jastar resýrstyq ortalyǵymen jáne «Rýhanı jańǵyrý» óńirlik jobalyq keńsesimen birlesip uıymdastyrdy.

Aktsııa barysynda uıymdastyrýshylar qala kóshelerinde adamdarǵa jaqyndap, qolynda shar tárizdi qurt jasyryp, olarǵa judyryqtaryn tıgizýdi usyndy. Óz kezeginde ótip bara jatqan adamdar da jaýap retinde judyryqty tıgizgen kezde alǵys retinde ashyq alaqanda arnaıy oralǵan qurt aldy.

Sonymen qatar, turǵyndar aldaǵy Alǵys aıtý kúni týraly pikirlerin aıtyp, mereke qarsańynda ózderiniń tilekterin jetkizdi.

«Árıne, bul kúni biz ata-analarymyzǵa, dostarymyzǵa, jaqyn adamdarymyzǵa alǵys aıtamyz. Alǵys aıtý- óte jaqsy is. Qańtar aıyndaǵy oqıǵalar kezinde Qazaqstan úshin eń qıyn sátterde óz ómirlerin qaterge tige otyryp, ózimizdi qaýipsiz sezinýge múmkindik bergen quqyq qorǵaý organdaryna erekshe alǵysymdy bildirgim keledi», - dep atap ótti oblys ortalyǵynyń turǵyny Danııar.

Shara aıasynda kókshetaýlyqtarǵa 500 dana qurt taratyldy. Aktsııa bir apta boıy jalǵasady.