Alǵys aıtý kúnin adamgershilik pen bárine keshirimmen qaraý merekesi retinde atap ótý kerek - Oleg Dymov
«Kezinde «toleranttylyq» termıni «tózimdilik» maǵynasyn bildirgen edi. Ýaqyt óte kele tek birlik qana memlekettigimizdi nyǵaıtyp jatqandyǵyn túsingennen keıin, toleranttylyqty adamgershilikti súıý retinde qarastyra bastadyq. Biz koreı kúntizbesi boıynsha Jańa jyldy birge atap ótemiz, Naýryz dastarhanyna barshamyz jınalamyz, sondaı-aq ózge de merekelik kúnderdi birge atap ótemiz. Al Alǵys kúnin adamgershilik pen beıbitshilikti súıý, barshasyna keshirimmen qaraý merekesi retinde atap ótken jaqsy»,- dedi O.Dymov Ortalyq kommýnıkatsııalar qyzmetindegi brıfıngte.
«Keshe Prezıdent Alǵys kúnin atap ótýdi usyndy. Biz ótken 20 jylda jaısyz jaǵdaılar men soǵystan aman boldyq. Meniń oıymsha, Alǵys kúni atap ótýge laıyq mereke. ıAǵnı, bir-birimizge rızashylyqpen qaraýymyz qajet», - dedi QHA Tóraǵasynyń orynbasary Lıýbov Nı.
Onyń sózine qaraǵanda, Assambleıa aldynda meıramnyń jáne sharanyń tujyrymdamasyn ázirleý mindeti tur.
Budan buryn habarlanǵandaı, Elbasy Nursultan Nazarbaev Qazaqstan halqy Assambleıasynyń HHІІ sessııasynda Alǵys aıtý kúnin atap ótýdi usynǵan bolatyn.
«Qazaqstan halqy Assambleıasy qurylǵan kún - 1 naýryzdy jyl saıyn barlyq etnostardyń bir-birine jáne meıirbandylyq tanytyp, ol adamdardy óz týǵanyndaı qabyldaǵan qazaqtarǵa alǵys aıtý kúni retinde atap ótý ádiletti bolar edi. Ol kún bizdi burynǵydan da góri jaqyndastyra túspek. Bul kún meıirimdiliktiń, búkil qazaqstandyqtardyń bir-birine degen dostyǵy men mahabbatynyń jarqyn merekesi bola alar edi», - dedi Prezıdent.
