Alǵys aıtý kúni petropavldyq zeınetkerler qoǵamdyq kólikte tegin júredi
Bul - «SQO Avtokólik odaǵy» qaýymdastyǵynyń bastamasy. Qaıyrymdylyq aktsııasyna jolaýshylar tasymaldaıtyn kompanııalardyń jetekshileri qoldaý kórsetti. Olar kóktemniń alǵashqy kúni, Alǵys aıtý merekesine oraı zeınetkerlerge jeńildik jasap, Petropavldaǵy qoǵamdyq kólikti qarttar úshin tegin etpek.
«Qaıyrymdylyq sharasyn dástúrli túrde uıymdastyramyz. Ádette zeınetkerlerimiz úshin Qarttar kúni qoǵamdyq kólikte júrý tegin bolatyn. 2016 jyldan bastap, Alǵys aıtý kúni merekesi paıda bolǵannan beri biz jylyna eki ret aktsııany uıymdastyratyn boldyq. Turǵyndar bul kúni zeınet kýáligin kórsetken jaǵdaıda jolaqy tólemeıdi. Bıyl 1 naýryz demalys kúnine túsip tur. Zeınetkerlerimiz bul kúni teatrlarǵa baryp, týǵan-týys, qurby-joldastaryn aralap, merekeni jaqsy ótkizedi dep senemiz», - deıdi «SQO Avtokólik odaǵy» qaýymdastyǵynyń tóraǵasy Galına Semenova.
Qazirgi ýaqytta Petropavl qalasynda qoǵamdyq kólikter 23 baǵyt boıynsha júredi. Jolaýshylar tasymalyna shamamen 280 avtobýs tartylǵan.
