Alǵys aıtý kúni: Ońtústikte kórshiler dastarhandas boldy
ShYMKENT. QazAqparat - Búgin Ońtústik Qazaqstan oblysynda «Kóshige izet» kúni atalyp ótti. 1 naýryz - Alǵys aıtý kúni qarsańyndaǵy onkúndik sharasy aıasynda uıymdastyrylǵan sharada aýyldarynyń aqsaqaldary men beldi azamattaryn dastarhan basyna shaqyryp, kezdesý ótkizdi, dep habarlaıdy QazAqparat tilshisi.
Oblys ákimi Janseıit Túımebaevtyń bastamasymen qolǵa alynǵan shara barysynda kórshi ornalasqan Saıram aýdany Qarabulaq eldi mekeniniń turǵyndary Túlkibas aýdany Myńbaı, Jambyl aýyldarynyń aqsaqaldary kezdesti. Kórshiler arasyndaǵy qarym-qatynasty bekemdeý jáne kórshige qurmet kórsetý maqsatynda turǵyndar bir-birin dastarhan basyna shaqyryp, júzdesti. Bir-birine iltıpat kórsetip, jergilikti etnos ókilderi qazaq eline degen aqedil alǵysyn bildirdi.
Igi sharaǵa oblys ákiminiń orynbasary Ulasbek Sádibekov qatysyp, eldiń birligi, etnosaralyq tatýlyqty saqtaýdyń mańyzyna toqtaldy.
«Birligimizdi kózdiń qarashyǵyndaı saqtap, onyń qadirin jete uǵynsaq, aýyl-aımaqtaǵy «tentekterimizdi» ýaqtyly tizgindep otyrsaq, biz barlyq asýlardan asamyz. Al, ishki tatýlyqtyń qadirin bilý, ony tereńinen túısiný, baıypty baǵamdaý sizder men bizderge júktelip otyrǵan aýqymdy jaýapkershilik ekenin uǵynýǵa mindettimiz», - dedi oblys ákiminiń orynbasary.
Mundaı is-sharalar óńirdiń barlyq aýdan qalalarynda uıymdastyryldy. Oblys kóleminde ótken merekelik jıyndarǵa Analar jáne qoǵamdyq kelisim keńesteri, etnomádenı birlestikter jáne túrli klýbtardan quralǵan 500-den astam ujym atsalysty. Qatysýshylar «Kórshige izet» taqyrybynda kórshiler arasyndaǵy syılastyq pen aýyzbirshilikti jáne kórshini qurmetteý týraly nasıhat jumystaryn júrgizdi.
Aıta keteıik, oblysta jańa sıpatta ári jańa mazmunda bastaý alǵan merekelik sharalar 1 naýryzǵa deıin jalǵasatyn bolady.
