Alǵys aıtý kúni: Biz qazaq eline alǵys aıtamyz - «Elefterııa» grek qoǵamynyń tóraǵasy G.Iordanıdı
ALMATY. QazAqparat - Búgin QR Arhıvinde «El birligi - asyl qazyna» taqyrybynda tarıhı qujattyq kórme ótti.
Jurtshylyq nazaryna qazaq halqy tarıhynyń qaıǵyly kezeńi - asharshylyq pen turǵyndardyń bir bóliginiń elden tys jerge kóship ketýge ákelgen kúshtep ujymdastyrý saıasaty, Qazaqstannyń polıetnıkalyq quramynyń qalyptasýyn, soǵys kezindegi evakýatsııa, tyń jáne tyńaıǵan jerlerdi ıgerý kezinde eldiń etnıkalyq quramynyń ózgerýi týraly baıandaıtyn tarıhı qujattar usynyldy.
Táýelsizdik kezeńi Qazaqstan halqy Assambleıasynyń, ulttyq mádenı ortalyqtardyń qujattarymen kórsetilgen.
Kórmeni Qazaqstan Respýblıkasy Prezıdentiniń Arhıvi sońǵy jyldarda basyp shyǵarǵan qujattyq jınaqtar men ǵylymı materıaldar tolyqtyrdy. Sonymen qatar, túrli ult sýretshileriniń sýretteri kórmege qoıyldy. Kelýshiler sol bir azapty jyldarǵa qaıtyp barǵandaı áserde qaldy.
«Kele jatqan meıram - barlyǵyna alǵys aıtatyn kún. Eń aldymen qazaqtyń darhan dalasyna alǵys aıtamyz. Qazaq eli bizdi qushaq jaıa qarsy aldy. Biz sonyń arqasynda adam boldyq. Kóbimiz ǵalym, akademık, jaqsy qyzmetker boldyq. Qazaqstan halyqtar dostyǵynyń zerthanasy deıtinbiz buryn, qazir Qazaqstan halyqtar dostyǵynyń ınstıtýty degen atqa ábden laıyq. Barlyq qazaqstandyqtardy osy merekemen quttyqtaımyn», - dedi QHA múshesi, Almaty oblysyndaǵy «Elefterııa» grek qoǵamynyń tóraǵasy Georgıı Iordanıdı.
Dóńgelek ústeldiń jumysyna «Nur Otan» partııasynyń músheleri, Qazaqstan halqy Assambleıasynyń músheleri, ulttyq mádenı ortalyqtardyń, memlekettik muraǵat mekemeleriniń ókilderi, ǵalymdar, qoǵam qaıratkerleri, Almaty qalasynyń joǵary oqý oryndarynyń oqytýshylary men stýdentteri qatysty.
