Alǵys aıtý kúni: «Birtutas Qazaqstan» atty fleshmob ótti

NUR-SULTAN. QazAqparat – Elordada tanymal sportshy Sergeı Tsyrýlnıkov pen Qazaqstan halqy Assambleıasynyń ókilderi Alǵys aıtý kúnine oraı ázirlegen «Birtutas Qazaqstan» atty fleshmob ótti, dep habarlaıdy QazAqparat tilshisi.

«Etnostarymyzdyń yntymaǵyn, Qazaqstan halqy dostyǵyn, qasıetti jerimizdiń qonaqjaılyǵyn kórsetý basty maqsat boldy. Fleshmobtyń máni de sonda jatyr. Buǵan qosa, elimizdiń Táýelsizdiginiń 30 jyldyq mereıtoıyna oraı fleshmobqa qatysýshylardyń da sany otyz adam», - dedi Sergeı Tsyrýlnıkov.

Onyń atap ótýinshe, bul is-shara QR Mádenıet jáne sport, Qorǵanys mınıstrlikteriniń, «Jas sarbaz» jastar patrıottyq qozǵalysynyń qoldaýymen uıymdastyryldy. Bastapqyda fleshmobdy munan da aýqymdy túrde uıymdastyrý josparda bolǵan. Alaıda oǵan aýa raıynyń qolaısyzdyǵy kedergi keltirdi.

«Elimizde kólemi 35*17,5 metrlik eń úlken tý bar. Bastapqyda osy týdy Qazaqstannyń barlyq etnos ókilderi ustap kóshege shyǵý josparda bolǵan edi. Alaıda kóshede 30 gradýs aıaz bolýyna baılanysty fleshmobty kólemi shaǵyndaý týmen Dostyq úıiniń ishinde ótkizýge týra keldi», - dedi ol.