Alǵys aıtý kúni: «Astana Opera» tyńdarmanyn qalaı qýantpaq
ASTANA. QazAqparat - Kóktemniń alǵashqy kúninde «Astana Operada» Alǵys aıtý kúnine arnalǵan «Júrekten kirip boıdy alar» atty merekelik kontsert ótedi. 1 naýryzda Kameralyq zal sahnasynda qazaqstandyq jarqyn mýzykanttar tyńdarmandarǵa óz ónerlerin pash etedi, dep habarlaıdy QazAqparat.
«Osy kontsert arqyly biz otandastarymyzdy barlyq qazaqstandyqtar úshin mańyzdy bolyp tabylatyn Alǵys aıtý kúnimen quttyqtaǵymyz keledi. Bul mereke Otanymyzdyń keń-baıtaq dalasyn mekendegen barlyq etnosty odan ári jaqyndastyra túsedi. Alǵys aıtý kúni - uly otanshyldyq, dostyq, mádenıetter san alýandyǵynyń kúni. Búgin árbireýimizdi elimiz úshin erekshe maqtanysh sezimi kerneıdi», - dedi oryndaýshylar.
Bul keshte keremet mýzykanttar, halyqaralyq konkýrstardyń laýreattary - «Daryn» memlekettik jastar syılyǵynyń ıegeri Asqar Dúısenbaev, Mádına Bekmádıeva (skrıpka), Qazaqstannyń eńbek sińirgen qaıratkeri Damır Sultanov (baıan), Anatolıı ıAkýshkın (kontrabas), Álibı Asaqaev (gıtara), Dana Dúısenbaeva (fortepıano) sahnaǵa shyǵady.
Alǵys aıtý kúni elimizde QR Prezıdenti Nursultan Nazarbaevtyń bastamasymen 2016 jyly - Qazaqstan halqy Assambleıasy qurylýynyń 20-jyldyǵynda jarııalanǵan bolatyn. Assambleıa qurylǵan kúni «Meıirimdiliktiń, búkil qazaqstandyqtardyń bir-birine degen dostyǵy men mahabbatynyń jarqyn merekesi» atap ótiledi. Respýblıkanyń ár óńirinde bul kúni kóptegen is-sharalar ótkiziledi.
«Astana Operada» osy saltanatty kúnge oraı halyqqa qazaq jáne batys eýropalyq klassıka jaýharlarynan turatyn qanyq kontserttik baǵdarlama usynylady. Onyń ishinde uly qazaq halyq kompozıtory Qumanǵazy Saǵyrbaıulynyń ansamblge arnalyp óńdelgen «Saryarqa» jáne «Tóremurat» kúıleri bar.
Ǵasyrlardan beri kóshpeli qazaqtyń adal dosy ári serigi - at bolyp sanalǵan. E.Brýsılovskııdiń «Bozaıǵyr» skrıpkalyq pesasynda ulan-ǵaıyr keń dalada jeligen boz arǵymaq - boz aıǵyrdyń beınesi batyldyq pen alǵa umtylýshylyqtyń nyshany retinde beınelenedi.
K.Sen-Sanstyń «Introdýktsııa jáne rondo-kaprıchchıozo» atty keńinen taralǵan pesasy skrıpkalyq asqan sheberlik múmkindikterin barynsha túsinip jazylǵan, al onyń formasy tabıǵı ári kórneki bolyp tabylady. Tyńdarmandarǵa frantsýz kompozıtorynyń «Havanez» atty taǵy bir shyǵarmashylyq úlgisi usynylady.
