Alǵys arqalaǵan azamat: Asqar Janbýrshıev 30 jyldan astam ýaqyt júrgizýshi bolyp isteıdi

AQTAÝ. QazAqparat - Eń úlken baqyt - súıikti isińmen aınalysý. Bul - Mańǵystaý aýdanyna qarasty Shebir aýylynyń turǵyny Asqar Janbýrshıevtiń ómirlik ustanymy. Táýelsizdik alǵan 30 jylda shalǵaıdaǵy shaǵyn aýyldy oblys ortalyǵymen jalǵap júrgen ol bul isti muqtajdyq emes, qushtarlyqpen atqarady, dep habarlaıdy QazAqparat tilshisi.

Osy ýaqytqa deıin Shebirden oblys ortalyǵy Aqtaý qalasyna túrǵyndardy tasyp, jalǵyz taksı júrgizýshisiniń qyzmetine turǵyndardan esh shaǵym túspepti.

Senim artyp, sharýasyna asyqqan ár jolaýshyny dittegen jerine jetkizýdi kózdeıdi.

Shalǵaıdaǵy Shebirden oblys ortalyǵyna jolaýshy tasý oǵan aıtarlyqtaı tabys túsirmeıdi.

Degenmen, aqshadan góri aýyldastarynyń alǵysyn alýdy qymbat sanaıtyn ol súıikti isinen ajyramaq emes.

«Meniń bul mamandyqqa degen qyzyǵýshylyǵym erekshe boldy. Eń alǵash «Kavz» avtobýsymen jolaýshylardy tasymaldap bastadym. Sebebi men, aýyldastarymdy aıtqan jerine jetkizip, rahmetin alsam sol súıikti isimniń nátıjesi dep bilemin. Odan bólek «Qalamqas», «Qarajanbas» óndiris oryndaryna jumysshylardy tasımyn. Keıingi ýaqytta «Pazık» avtobýsyn da júrgizdim. Ósirgen ul-qyzym jaqynda zaman talabyna saı «Gazel» mıkroavtobýsyn syılady. Shyny kerek, ózimniń unatyp júrgen kásibı isime osyndaı kólik syılaǵanda ishteı qýandym. Ótkenge kóz júgirtip qarasam, uzaq jylǵy etken eńbek jolymda eshqandaı jol apaty, basqa da jaǵdaılar oryn alǵan emes. Zeınet jasynan keıin bul isti ulyma tapsyramyn»,- deıdi Asqar Janbýrshıev.

Asqar Janbýrshıev - búginde halyq yqylasyna bólengen aýyldyń syıly azamaty.

Uzaq jyldarǵa sozylǵan abyroıly qyzmetiniń arqasynda QR Kólik jáne kommýnıkatsııa mınıstrliginiń «Qurmetti avtokólikshi» tósbelgesimen marapattalǵan.

Birneshe márte aýdan, aýyl ákimderiniń alǵys hatyn ıelengen.