Alǵys aıtý kúni: Atyraýda ózge etnostyń balasy «Erke sylqym» kúıin tartyp berdi
ATYRAÝ. KAZINFORM – Atyraýda 1 naýryz – Alǵys aıtý kúnine oraı «Alǵys aıtý – adamgershiliktiń belgisi» chellendji ótip jatyr. Atalǵan chellendjdi «Qoǵamdyq kelisim» kommýnaldyq memlekettik mekemesi uıymdastyrdy.

Chellendjge Atyraý qalasyndaǵy jalpy bilim beretin №24 orta mekteptiń oqýshylary da qatysty. Sonyń biri – Stepan Parhomenko.
Ol qazaqsha múdirmeı sóıleıdi. Qazaqtyń ulttyq aspaby – dombyramen kúı shertedi.
Búgin barshany 1 naýryz – Alǵys aıtý kúnimen quttyqtap, kompozıtor Ábdimomyn Jeldibaevtyń «Erke sylqym» kúıin oryndap berdi.
Atyraýdaǵy «Dovıra» ýkraın etnomádenı birlestiginiń ókili Sofııa Pavlenko da qazaq halqyna alǵysyn bildirdi.
– Biz bir shańyraqtyń astynda turamyz. Biz – qazaqstandyq bir otbasynyń múshesimiz. Qazaq baýyrlarymyzǵa qaıyrymdylyǵy, meıirimdiligi úshin, toleranttylyǵy men adamgershiligi, syılastyǵy úshin alǵysymdy aıtamyn. Bizdiń Qazaqstanymyz órkendep, birligimiz arta bersin, -deıdi Sofııa Pavlenko.
Eske sala ketelik, budan buryn QHA keńesiniń múshesi qazaq halqyna salt-dástúri men tilin meńgerý arqyly da alǵys aıtýǵa bolatynyn bildirgen edi.