Alǵys aıtý kúni: astanalyq oqýshylar erekshe chellendj uıymdastyrdy
ASTANA. KAZINFORM — Astanada 1 naýryz — Alǵys aıtý kúnin merekeleý aıasynda № 116 orta mekteptiń oqýshylary «Alǵys — júrekten júrekke» atty erekshe aktsııa ótkizdi, dep habarlaıdy elorda ákimdiginiń resmı saıty.
Bilim ordasynyń holynda oqýshylar alǵys, qurmet pen birlikti beıneleıtin júrek pishindi áýe sharlaryn ustap, sap túzedi. Erekshe aktsııa merekeniń basty ıdeıasy jaqyndarǵa, ustazdarǵa jáne aınaladaǵy jandarǵa shynaıy rızashylyq bildirýdi nasıhattaýǵa arnaldy.
Aktsııanyń ereksheligi — sımvolıkalyq estafeta elordanyń ózge de bilim berý uıymdaryna joldandy. № 116 mekteptiń oqýshylary qatarlastaryn bastamany qoldaýǵa shaqyryp, chellendjdi ózge astanalyq mektepterge joldady. Osylaısha alǵys aıtý ıdeıasy keńinen taralady dep josparlanyp otyr.
— Biz jylylyq pen birlikke toly shynaıy atmosfera qalyptastyrǵymyz keldi. Júrek — meıirim men qurmettiń belgisi. Balalardyń mereke týraly jaı ǵana bilip qoımaı, onyń mánin júrekpen sezingeni biz úshin mańyzdy», — dedi mektep dırektory.
Aktsııaǵa qatysýshylardyń biri shara barysynda qandaı sezimde bolǵanyn aıtty.
— Júregimizdi ustaǵanda mańyzdy is atqaryp jatqandaı sezimde boldyq. Bul — ata-anamyzǵa, ustazdarymyzǵa jáne janymyzdaǵy jandarǵa alǵys aıtýdyń bir joly, — dedi ol.
Uıymdastyrýshylar mundaı bastamalar óskeleń urpaq arasynda alǵys aıtý mádenıetin, ózara qurmet pen azamattyq jaýapkershilikti qalyptastyrýǵa yqpal etetinin atap ótti.
Aktsııa qarapaıym ıdeıanyń ózi elordanyń oqýshylaryn meıirim men aýyzbirshilik qundylyqtary tóńiregine toptastyra alatynyn kórsetken erekshe úlgige aınaldy.
Buǵan deıin alǵys aıtý kúni álem elderinde qalaı toılanatynyn jazǵanbyz.