Alǵys aıtý kúni: Áskerı boryshyn ótep júrgen ózge ult ókilderi alǵys aıtty
AQTÓBE. KAZINFORM - QR Ulttyq ulanynyń «Batys» óńirlik qolbasshylyǵyna qarasty 55/17 áskerı bóliminde ózge ult ókilderi de Otan aldyndaǵy boryshyn ótep jatyr. Orys, tatar, ázerbaıjan, qyrǵyz, ózbek, uıǵyr ultynyń ókilderi Alǵys aıtý kúni týraly óz oı-pikirlerin ortaǵa saldy.
«Bul kún qazaqtardyń baýyrmal ári qonaqjaılylyǵynyń kórsetkishi desem artyq aıtqanym emes. Kóktemniń jaımashýaq jylýymen tuspa-tus kelgen merekede men ata-anama, dostaryma alǵys aıtqym keledi. Qıyn ýaqytta kómektesip, qoldaý men qamqorlyq kórsetkeni úshin shyn júrekten rızashylyǵymdy bildiremin»,- dedi 55/17 áskerı bólimi atqyshtar rotasynyń sarbazy Saıd Armedınov.
Ol Almaty oblysy Ketpen aýylynda dúnıege kelgen. 18 jastaǵy jigit qazaq tilinde erkin sóıleıdi.
«Ózim Almaty oblysy Uıǵyr aýdanynan kelip, Otan aldyndaǵy boryshymdy ótep júrmin. Qazaq tilin erkin meńgergen soń meniń janymda dos kóp. Otbasymyzda qazaq tilinde sóıleımiz, munda da qazaqtar arasynda joldas taýyp, qýanyp qaldym»,- dedi ol.
55/17 áskerı bóliminde boryshyn ótep júrgen Farýh Týǵalov Túrkistan oblysynyń týmasy. Ol qazaq mektebinde bilim alǵan, tipti dombyra tartady.
«Qazaqstan – meniń týǵan jerim. Ata-anam, baýyrlarym osynda. Ultym tájik bolǵanymen, tilim de, júregim de qazaq dep aıtar edim. Ózim qazaq mektebinde bilim alyp, ulttyq aspap - dombyrany da úırenip aldym. Alǵys aıtý kúni biz úshin de úlken ári jaýapty mereke. Bul qıyn-qystaý kezde qýanysh pen qaıǵyny bólisip, ózgelerge pana bola bilgen qazaq halqyna ózge ult ókilderiniń rızashylyǵyn aıtýǵa múmkindik berilgen shaq. Osy kúni janymdaǵy jannyń bárine alǵys aıtamyn. Alǵys aıtý - bul adamnyń júregine erekshe jylýlyq syılaıtyn keremet qasıet, adamgershiliktiń joǵarǵy kórsetkishi»,- dedi qatardaǵy jaýynger Farýh Týǵalov.
QR Ulttyq ulanynyń «Batys» óńirlik qolbasshylyǵyna qarasty 55/17 áskerı bóliminde 400-den astam qazaqstandyq áskerı boryshyn ótep júr.
