Alǵys aıtý kúni álem elderinde qalaı toılanady
ASTANA. KAZINFORM — Alǵys aıtý kúni erekshe tarıhymen qazaq eliniń ajyramas bóligine aınaldy. Bul kúni túrli etnos ókilderi, jastar men aqsaqaldar bas qosady. Kazinform agenttiginiń tilshisi bul mereke álemniń taǵy qaı elinde atalyp ótetinin anyqtady.
Ár halyqtyń ózine tán birlik belgileri bolady. Kópultty Qazaqstan úshin bul árqashan dostyq, beıbitshilik pen kelisim. Jaqynyńa kómektesý jáne janashyrlyq tanytý ómir súrý salty jáne urpaqtan urpaqqa sabaqtasyp kele jatqan biriktirýshi faktorǵa aınalǵan.
Ǵasyrlar boıy Qazaqstan júzdegen halyqtyń mekenine aınalyp, olar táýelsiz memleket qurý úshin birge ómir súrýdi úırendi.
Alǵys aıtý kúnin qurý ıdeıasy, árıne, jańashyldyq emes. Mundaı merekeni jer sharynyń túkpir-túkpirinen kezdestirýge bolady. Árıne, eń birinshi oıǵa AQSh pen Kanadada atalyp ótetin Thanksgiving Day eske túsedi. AQSh-ta bul kún qarashanyń sońǵy beısenbisinde, al Kanadada qazannyń ekinshi dúısenbisinde atalyp ótedi. Atalǵan elderde merekeniń tarıhy baıyrǵy halyqtarǵa jańa álemde aman qalýǵa kómekteskeni úshin jáne egin jınaǵan Qudaıǵa alǵysyn bildirgen alǵashqy qonystanýshylardyń tarıhymen tyǵyz baılanysty. Bul kúni amerıkalyqtar men kanadalyqtar otbasylaryna, jaqyndaryna jáne dostaryna alǵys bildiredi.
Brazılııada da osyndaı mereke bar — «Dıa de Achao de Grasas», bul da Alǵys aıtý kúnin bildiredi. Olar ony amerıkalyq merekege uqsas qarashanyń sońǵy beısenbisinde atap ótedi. Merekede brazılııalyqtar Qudaıǵa, otbasyna, dostaryna jáne áriptesterine kómekteri men qoldaýlary úshin alǵys aıtady.
Taǵy bir uqsas mereke — nemisterdiń «Erntedankfest» merekesi. Ol — qazan aıynyń basynda ótetin jáne hrıstıan dástúrlerimen baılanysty eginge alǵys aıtý merekesi. Bul kúni adamdar shirkeýlerdi jınalǵan jemistermen bezendirip, qaıyrymdylyq sharalaryn ótkizedi.
Japonııalyqtar «Kinrō Kansha no Hi» nemese Eńbekti baǵalaý kúnin atap ótedi. Ol 23 qarashada toılanady. Mereke eńbekshilerdi qurmetteý kúni retinde bastaý alyp, eldiń eginshilik dástúrlerinen tamyry tereńde jatyr. Bul kúni bastyqtar qaramaǵyndaǵylardy quttyqtaıdy jáne adamdar toptarǵa jınalyp, muǵalimderi men tálimgerlerine alǵys aıtady.
Ońtústik Koreıada da osyndaı mereke bar — Chhýsok. Bul eldegi basty merekelerdiń biri jáne ol 8-shi aıdyń 15-shi kúni toılanady. Ádette bul kún qyrkúıek nemese qazan aıynyń basyna keledi.
Bul kúni kárister ata-babalaryna qurmet kórsetip, otbasyna, týǵan-týystaryna, dostaryna alǵys bildiredi. Otbasylar bas qosyp, ata-anasynyń beıitterine zııarat etip, eske alý rásimderin jasap, dástúrli taǵamdarmen merekelik dastarhan jaıady.
Qytaıda «Kúz ortasy festıvali» ótedi. Onda adamdar ata-babalaryna, otbasy múshelerine jáne dostaryna qoldaýy men qamqorlyǵy úshin alǵys bildiredi.
Bul elderdiń barlyǵynda merekeniń tamyry men dástúri ártúrli bolǵanymen, negizgi ıdeıasy ózgerissiz — ómirge rızashylyq, meıirimdilik pen bir-birine qoldaý kórsetý.
Alǵys kúnine oraı Almaty men Astanada ótetin is-sharalar týraly buǵan deıin jazǵan bolatynbyz.