Alǵashqy jeke ǵarysh mıssııasy HǴS-ǵa jetti

NUR-SULTAN. QazAqparat - SpaceX zymyran tasyǵyshymen orbıtaǵa ushyrylǵan Axiom kommertsııalyq aeroǵarysh kompanııasynyń Endeavour ǵarysh kapsýlasy Halyqaralyq ǵarysh stantsııasymen (HǴS) sátti túıisti, dep habarlaıdy QazAqparat BBC-ge silteme jasap.

Bul - birneshe jyldan keıin óziniń orbıtalyq stantsııasyn salýdy josparlap otyrǵan kompanııanyń HǴS-ǵa alǵashqy tolyqtaı jeke mıssııasy.

Ushqysh pen úsh jolaýshydan turatyn Axiom-1 ekıpajy birneshe saǵattan keıin HǴS bortyna ótip, onda 8 kún bolady. Jolaýshylardyń árqaısysy mıssııaǵa qatysý úshin 55 mıllıon dollardan tólegen. Olar jaı ǵaryshqa saıahattaýshylar ǵana emes, stantsııanyń ǵylymı áleýetin paıdalanyp, birneshe tájirıbe jasaý úshin ushyp bardy.

Mıssııany NASA-nyń burynǵy astronavty Maıkl Lopes-Alegrııa basqarady. Sondaı-aq, amerıkalyq kásipker jáne ushqysh Larrı Konnor, ızraıldik fılantrop jáne ınvestor Eıtan Stıbbe men kanadalyq kásipker, ınvestor jáne fılantrop Mark Petı qazir orbıtada.

Eske sala keteıik, amerıkalyq ǵarysh kemesiniń HǴS-ǵa alǵashqy jeke mıssııasy bastalǵanyn jazǵan bolatynbyz.