Alǵashqy Prezıdenttik shákirtaqy ıegeri ataný úlken mindet júkteıdi
MATY. 5 qazan. QazAqparat /Erbol Azanbek/ - Alǵashqy Prezıdenttik shákirtaqy ıegeri ataný úlken mindet júkteıdi. Bul týraly Prezıdenttik shákirtaqyny ıelengen QazUÝ-dyń qos magıstranty Dılıara Kopytına men Dıana Búrlibaeva búgin QazUÝ-de oqytýshy, stýdenttermen kezdesýi barysynda aıtty.
Kezdesý barysynda olar Elbasynyń qabyldaý rásiminde tek Prezıdent retinde emes, sonymen qatar, ǵalym, akademık retinde de oı bóliskenin aıtyp, ózderin jas ǵalym retinde shynaıy sezingenderin aıtyp jetkizdi. Barlyq magıstranttardyń ǵylymı jumystarymen jınalǵan qaýymdy tanystyryp, olardyń da zerttep otyrǵan taqyryptaryn tarqatyp aıtty. Sondaı-aq, Prezıdentpen kezdesýden keıin QR Bilim jáne ǵylym mınıstri B.Jumaǵulovpen te júzdesip, QazUÝ stýdentteri atynan «Ál-Farabı» músinin syıǵa tartyp qaıtypty.
«Biz, elimizdegi alǵashqy Prezıdenttik stıpendııa ıegerlerimiz, bul biz úshin úlken maqtanysh ári qýanysh. Barlyq magıstranttar men stýdentterge ǵylymmen aınalysyńyzdar, el erteńi búgingi sizdiń bastamańyzdan bastalady», - dedi kezdesýde Dılıara men Dıana.
Dılıara Kopytına - bıologııa jáne bıotehnologııa fakýltetiniń «Bıotehnologııa» mamandyǵynyń magıstranty, al Dıana Búrlibaeva - geografııa jáne tabıǵatty paıdalaný fakýlteti «Gıdrometeorologııa» mamandyǵynyń magıstranty.
Dılıara 2008 jyldan bastap Bıologııa jáne bıotehnologııa ınstıtýtynyń negizgi ǵylymı jobalaryna qatysyp, jumys isteýde. Bıologııa boıynsha respýblıkalyq ǵylymı olımpıadasynyń 2009 jyldyń júldegeri. 2010 jyldan bastap bıologııa jáne bıotehnologııa fakýltetiniń bıotehnologııa kafedrasynyń magıstranty. Ǵylymı jumysy mańyzdy jemis-jıdek daqyldarynyń vırýstarynan týyndaıtyn problemalardy zertteý men joıýǵa arnalǵan. Qazirgi kezde júzim vırýstarynyń qazaqstandyq test-júıelerin shyǵarý jumysymen aınalysady.
Ekinshi stıpendıat - Dıana Búrlibaeva, bakalavrıatta oqyp júrgende Almaty qalasynyń sý tutyný men sýdy paıdalaný máselelerin zerttep, sol jumysy úshin QR Bilim jáne ǵylym mınıstrliginiń 1-shi dárejedegi dıplomymen marapattalǵan. Dıplomdyq jumysy Ertis, Esil, Tobyl ózenderiniń gıdrohımııalyq ózgerýin zertteýge arnalǵan. Qazirgi tańda geografııa jáne tabıǵatty paıdalaný fakýltetiniń magıstratýrasynda oqyp júrip, zertteý obektisi retinde Qazaqstannyń barlyq negizgi ózenderin alyp, osy ǵylymı jumysyn jalǵastyrýda. 2008 jyldan bastap QR BjǴM Geografııa ınstıtýtynyń ǵylymı jobalaryna qatysýshysy.
