Alǵashqy memlekettik jastar radıosy «Tuńǵysh Prezıdent kúnin» merekeleýge tanymdyq habarlary men áýezdi ánimen ún qospaq

ASTANA. 30 qarasha. QazAqparat - Astana radıosynyń 1 jeltoqsandaǵy habarlar kestesi merekelik baǵdarlamalarmen, jastarǵa arnalǵan patrıottyq ándermen tolyǵady. Bul kúni Tuńǵysh memlekettik jastar arnasynda Elbasynyń halyq aldyndaǵy eren eńbegi túrli taqyryptar aıasynda qarastyrylady.

Bul týraly Astana radıosynyń baspasóz qyzmeti habarlady.

Mereke kúni tańǵy saǵat 8-den keshki 20.00-ge deıin Astana radıosyn 101,4 FM jıiliginde tikeleı efırde tyńdap qana qoımaı, www.astanafm.kz saıtynan onlaın beınekórsetilim arqyly tamashalaı alatyndaryńyzdy esterińizge salamyz. Baǵdarlamalarǵa qatysatyn ár býyn ókili táýelsiz elimizdiń basty damý baǵyttary boıynsha óz oılaryn ortaǵa salady. Olardyń ishinde qoǵam qaıratkerleri, memlekettik qyzmetkerler, sportshylar, otandyq estrada juldyzdary, belsendi jastar, tipti búldirshinder de bar.

Osy kúngi merekelik efır shymyldyǵy saǵat 8.00-de resmı jańalyqtarmen ashylady. Jańalyqtar toptamasynan 1 jeltoqsan kúni ótetin resmı, merekelik, qoǵamdyq sharalardan qulaǵdar bola alasyzdar. Sondaı-aq osy kúni «Bizdiń Otanymyz - Qazaqstan» taqyrybynda arnaıy tańǵy shoý-baǵdarlamasy usynylady. «Men qazaqpyn!» aqparattyq-tanymdyq baǵdarlamasyna «Máńgilik El» taqyryby arqaý bolady. Habar qonaqtary «Máńgilik el» tujyrymdamasy men sol joldaǵy basty damý baǵyttarymyzdy túsindiredi. Eki tilde «Arnaıy qonaq» - «Spetsıalnyı gost» habarynda Qazaqstan atyn álemge áıgileıtin EKSPO - 2017 Halyqaralyq kórmesine daıyndyq barysy sóz bolmaq. Al «Shańyraq» baǵdarlamasy «Bir el, bir halyq, bir taǵdyr» taqyrybynda órbıdi. Onda bir shańyraq astyndaǵy túrli ult ókilderiniń tatý ǵumyry, etnosaralyq qatynastyń qazaqstandyq modeli týraly sóz bolady. «Ultty súıý - uly sezim» taqyryby aıasyndaǵy «Qaharman» habarynan Ulttyq Gvardııa ulandarynyń jaýyngerlik ómiri, oı-pikiri, óneri men shyǵarmashylymen de sýsyndaı alasyzdar. Álemdik dodalarda elimizdiń namysyn tý etip, túrli sporttyq saıystarda topjarǵan sportshylar erligi týraly «Namys» habarynda aıtylady. Osy kúngi Astana radıosynyń merekelik kestesi Tuńǵysh Prezıdent kúnine arnalǵan arnaıy reportajben qorytyndylanady. Habar barysynda kúnniń basty jańalyqtarymen, ótkizilgen basty sharalarmen, elorda turǵyndarynyń merekelik tynysymen tanysa alasyzdar.