Alǵashqy kezde qorqyp jylaǵandar boldy –dárigerler koronavırýspen qalaı kúresip jatyr
ATYRAÝ. QazAqparat – Atyraýdaǵy №2 oblystyq aýrýhananyń ınfektsııalyq statsıonarynda medqyzmetkerler táýlik boıy jumys isteýde. Aýrýhana dırektorynyń orynbasary Nadıa Erǵalıeva koronavırýspen kúresip jatqan dárigerler týraly aıtyp berdi, dep habarlaıdy QazAqparat.
Aýrýhana dırektorynyń orynbasary Nadıa Erǵalıevanyń aıtýynsha, mundaǵy medıtsınalyq qyzmetkerler kún saıyn Covid-19 indetin juqtyrǵan naýqastardy emdep, olarǵa qajetti kútim kórsetýde. Dárigerler, medbıkeler men feldsherler, tazalyqshylar 27 naýryzdan beri aýrýhanadan shyqpaı, táýlik boıy jumys isteýde.
«Infektsııalyq bólimshede 6 dáriger-ınfektsıonıst, 3 reanımatolog bar. Báriniń de tájirıbesi mol. Qazir 9 dárigerdiń bári táýlik boıy jumys isteýde. Aýrýhana ákimshiligi hırýrgııa jáne terapııa bólimshelerin bosatyp, demalys bólmesi retinde jasaqtap berdi. Qazir bizdiń dárigerler, medbıkeler men laboranttar, tazalyqshylar úshin qolaıly jaǵdaı jasaldy. Olar kúnine 6 ret tamaqtanady. Kúnine birneshe ret dýshqa túsip, kıimderin aýystyrady» -deıdi Nadıa Erǵalıeva.
Onyń aıtýynsha, dárigerler naýqastarǵa barmas buryn arnaıy kıim kıedi. Onyń ishinde hırýrgııalyq shalbar, qorǵanysh kostıými, kózildirik, respırator, eki qolǵap, rezeńke aıaq kıim, bahıla bar. Naýqastar jatqan bólimde munyń birde birin sheshýge bolmaıdy. Demek, sý ishý de, tipti dárethanaǵa barý da múmkin emes.
Al, naýqastardyń jaǵdaıyn tekserip, baqylaý júrgizgen soń medıtsınalyq qyzmetkerlerdiń arnaıy kıimderi joıylady. Ózderi dýsh túske, beti-qolyn óńdeýden ótkizedi. Munyń bári tazalyq aımaǵynda júrgiziledi. Al, jumys isteý aımaǵynda ár naýqastyń qyzýy, jalpy jaǵdaıy týraly málimetter elektrondy jýrnalǵa jazylady. Dál osylaı aýysym saıyn qaıtalanady. Demalys aımaǵyndaǵy jatyn bólmeleri qajetti jıhazben jabdyqtalǵan.
«Alǵashqy kúni ońaı bolǵan joq. Óıtkeni, medıtsınalyq qyzmetkerlerdiń eshqaısysy mundaı ınfektsııa juqtyrǵandarmen jumys istemegen. Bárimizde qorqynysh bolyp, aramyzda kóz jasyna erik bergender boldy. Arnaıy kıimmen júrý qıyndyq týdyrdy. Ystyq, qapyryq aýada júrgendeısiń. Ár sát saıyn vırýs juǵa ma degen qorqynysh ta bar. Keıin oblystyq densaýlyq saqtaý basqarmasy tájirıbeli 2 psıhologty jiberip, olar medıtsınalyq qyzmetkerlermen, naýqastarmen jumys júrgizdi. Bizdiń ujym 27 naýryzdan beri jańa rejımmen jumys isteýge beıimdeldi. Qazir jumysymyz qalypqa tústi» -deıdi Nadıa Erǵalıeva.
Sondaı-aq, ol dárigerlerdiń 27 naýryzdan beri aýrýhanadan shyqpaǵanyna toqtaldy.
«Biz ázirge ınfektsııalyq statsıonardan shyǵa almaımyz. Óıtkeni, dertke shaldyqqandarmen tyǵyz baılanysta jumys isteımiz. Atyraýda indettiń alǵashqy oqıǵasy tirkelgen kúnnen beri osyndamyz. Týystarymyzben telefon arqyly baılanystamyz, - dedi Nadıa Erǵalıeva.
Qazir bul aýrýhananyń ınfektsııalyq statsıonarynda Covid-19 indetin juqtyrǵan 18 naýqas emdelýde.
