Alǵashqy qazaqstandyq mıýzıkl sahnalandy
ASTANA. QazAqparat - «Qazaqkontsert» Ortalyq kontsert zalynda «Dostar serti» mıýzıkliniń jańa kórsetilimi ótti. Jańa mýzykalyq qoıylym biregeı týyndy. Alǵashqy qazaqstandyq mıýzıkl - jýyrda «Qazaqkontsert» Memlekettik kontserttik uıymnyń janynda ashylǵan «Astana Musical» jańa mýzykalyq teatry ujymynyń birlesken eńbeginiń jemisi, dep habarlaıdy QazAqparat Mádenıet jáne sport mınıstrliginiń saıtyna silteme jasap.
«Bul elimiz úshin mańyzdy oqıǵa. Eń aldymen, mınıstrliktiń bastamasy men qoldaýynyń arqasynda aty ańyzǵa aınalǵan «Qazaqkontsert» kontserttik uıymyn saqtap qaldyq. Qanshalyqty qıyn bolǵanymen, nátıjesinde súıikti ataýdy saqtap, Astana qalasynda biregeı uıym qurdyq. Bul jerde 100 paıyz qazaqstandyq týyndylar dúnıege keledi dep tolyqtaı senemin. Qazaqstandyqtarǵa Táýelsizdigimizdiń 25-jyldyǵyna oraı osyndaı syı jasaý biz úshin qurmet» - dep atap ótti «Qazaqkontsert» memlekettik kontserttik uıymynyń dırektory Saltanat Seıdimbek.
Mıýzıkldiń lıbrettosyn tanymal qazaqstandyq aqyn jáne stsenarıst Baqyt Qaıyrbekov jazdy. Qoıylym mýzykasynyń avtory Qazaqstannyń eńbegi sińgen qaıratkeri, dırıjer Artýr Orenbýrgskıı bolsa, rejısseri - Eslıam Nurtazın. Aqyn, dramatýrg Annas Baǵdat mıýzıkldi qazaq tiline aýdardy.
Qoıylymǵa jas ártister, T.Júrgenov atyndaǵy óner akademııasynyń joǵarǵy kýrs stýdentteri men túlekteri qatysty. Olardyń barlyǵy birneshe deńgeıli irikteýden ótip, óz rólderin alǵan. Ártisterdi tańdaýdaǵy basty talap - vokal, bı jáne akterlik sheberlik boldy. Mıýzıkl oryndaýshylary men hory «Akademııa solıstov» memlekettik kameralyq orkestri men T.Júrgenov atyndaǵy óner akademııasynyń «Big band» ansambliniń súıemeldeýimen jandy daýysta án shyrqaıdy.
Mıýzıkl jelisi boıynsha elimizdiń ár óńirinen konservatorııaǵa oqýǵa kelgen tórt jigittiń basynan keshken qyzyqty oqıǵalary, jastyq shaq, dostyq pen mahabbat jaıy baıandalady. Oqıǵa 60-70-shi jyldar kezeńinde órbıdi. Mıýzıklǵa sol jyldarda áıgili bolǵan, qazaq mýzykasynyń «altyn qoryna» engen: Sh.Qaldaıaqov, E.Hasanǵalıev, «Dos-muqasan» tobynyń ánderi arqaý boldy. Álemdik mýzykanyń jaýharlary Frankel, Bıtlz repertýarynyń shyǵarmalary oryndalady. Sondaı-aq, jańa stılıstıkalyq baǵytta jazylǵan kompozıtsııalar da bar.
«Astana Musical» - elimizdegi «Qazaqkontsert» memlekettik kontserttik uıymynyń negizinde qurylǵan tuńǵysh mamandandyrylǵan mıýzıkl teatry. Spektaklde jas akterlar óner kórsetedi. Jańa teatr zamanýı baǵyttarǵa negizdelip, otandyq mıýzıklderdiń biregeı repertýarynyń ortalyǵyna aınalmaq.
Mádenıet qaıratkerleriniń pikirinshe, «Qazaqkontsert» elordanyń mádenı áleýetin arttyryp, elimizdegi teatr qyzmetiniń alýan túrli janryn keńeıtýge múmkindik beredi. Endi qazaqstandyq ártister «Qazaqstan» kontsert zalynyń múmkindigin paıdalana otyryp, sheberligin shyńdap, kásibı biliktiligin arttyra alady.
