Alǵashqy handarymyzdyń tuǵyrly belgisin Tuńǵysh Prezıdenttiń murajaı saıabaǵynda ornatýda úlken mán bar - N. Nazarbaev
ASTANA. Maýsymnyń 1-i. QazAqparat /Qanat Mámetqazyuly/ - Alǵashqy handarymyzdyń tuǵyrly belgisin Tuńǵysh Prezıdenttiń murajaı saıabaǵynda ornatýda úlken mán bar. Búgin QR Prezıdenti Nursultan Nazarbaev Kereı men Jánibek handardyń monýmentaldy músindik-kórkem kompozıtsııasyn ashý rásiminde sóılegen sózinde osylaı dedi.
Óz sózinde Memleket basshysy N. Nazarbaev, tarıhta Kereı men Jánibek handardyń attary árqashan birdeı atalatynyn, eki hannyń elge jasaǵan eńbegi men erligi birdeı baǵalanatynyn eske saldy. Sondyqtan, Memleket basshysy ultymyzdyń uly tulǵalaryn bólip-jarmaı, eki hanǵa eskertkish birge qoıylyp otyrǵanyn atap ótti.
«Alash jurtynyń alǵashqy handary Kereı men Jánibekke arnalǵan bul eskertkishtiń osy jerde boı kóterýinde úlken mán bar. Búginde táýelsizdigimizdiń boıtumaryna, elimizdiń rámizine aınalǵan asqaq Astananyń alǵashqy kirpishi de osy jerde (qazirgi QR Tuńǵysh Prezıdenti murajaıynda) qalanǵany belgili. Alǵashqy ordamyz bastapqyda osy jerde ornalasyp, mańaıynda memlekettiń mańyzdy mekemeleri qonys tepti. Sondyqtan da biz alǵashqy handarymyzdyń tuǵyrly belgisin Tuńǵysh Prezıdenttiń murajaı saıabaǵynda, Astana qalasy ákimdigi ǵımaratynyń qasynda ornalastyrýdy jón sanadyq», dedi Prezıdent.
Sonymen qatar, Prezıdent eskertkishti ornatýǵa tek sáýletshiler ǵana emes, belgili tarıhshy-ǵalymdar da úles qosqanyn, keıipkerlerdiń syrtqy kelbetteriniń sol dáýirge meılinshe saı kelýine basa kóńil bólingenin aıtty. Bul rette sonaý dáýirden beri tuńǵysh handardyń sýretteri men músinderi qalmaǵanyn aıta kele, Elbasy «bundaǵy basty másele - osynaý ultymyz úshin uly tulǵalardyń istegen isterine mán berip, ony bolashaqqa, urpaqqa bildirý» ekendigin jetkizdi.
