Alǵashqy betmobıl $137 myńǵa satyldy
ASTANA. QazAqparat - Amerıkanyń Dallas qalasynda ótken Heritage Auctions bássaýdasynda telehıkaıa keıpikeri Betmenniń resmı lıtsenzııa alǵan avtokólikteriniń eń alǵashqysy 137 myń dollarǵa satyldy, dep habarlaıdy Reuters.
Biregeı avtokólikti 1963 jyly Forrest Robınson qurastyrǵan edi. Amerıkandyq sýperbatyrdyń jankúıeri 1956 jyly shyqqan Oldsmobile 88 avtokóligin betmobılge aınaldyrý úshin úsh jyl ýaqytyn sarp etken. Ol óz týyndysyn jasaýda 1940-50 jyldardaǵy komıksterdi basshylyqqa alǵan.
Robınsonnyń kóligi avtodızaıner Djordj Barrıs 1968 jylǵa deıin kórsetilgen «Betmen» telehıkaıasy úshin betmobıl qurastyrǵanǵa deıin birneshe jyl buryn qurastyryldy. Telehıkaıa asa tanymaldylyqqa ıe bolǵan soń Betman obrazynyń lıtsenzııasyna ıe DC Comics Robınsonnyń kóligin jaldap, týrıstik maqsattarda paıdalanǵan. Arada birneshe jyl ótken soń telehıkaıada paıdalanylǵan kólikterdiń alǵashqy kóshirmeleri qurastyrylǵanda, Robınson óz kóligin qaıtaryp alyp, satyp jibergen. Onyń tot basyp qalǵan konstrýktsııasy 2008 jyly Nıý-Gempshır shtatynda tabyldy. Birneshe adamnyń qolynan ótken soń ony 2013 jyldyń aqpan aıynda Toy Car Exchange ınternet-servısi satyp alyp, satylymǵa qoıdy. Betmobıldi alǵashqy qalpyna keltirýmen Borbon Fabrications kompanııasy aınalysty. 2013 jyldyń qańtar aıynda dańqty telehıkaıa úshin jasalǵan alty betmobıldiń alǵashqysy 4,6 mıllıon dollarǵa - rekordtyq somaǵa satyldy.
