Alǵashqy jaǵdaı anyqtaldy: Densaýlyq saqtaý mınıstrligi qazaqstandyqtarǵa eskertý jasady
ASTANA. KAZINFORM – Qazaqstanda A(H1N1)pdm09 maýsymdyq tumaýynyń alǵashqy bes jaǵdaıy tirkeldi.
Sonymen qatar sońǵy aptada jedel respıratorlyq vırýstyq ınfektsııalarmen (JRVI) syrqattanýshylyq 10%-ǵa tómendedi. Tumaýǵa qarsy vaktsınatsııalaý naýqany bastalǵaly beri 240 myńnan astam adam ekpe aldy. Bul týraly QR Densaýlyq saqtaý mınıstrligi habarlady.
Epıdemıologııalyq monıtorıng derekterine sáıkes tumaýdyń úsh jaǵdaıy Astana qalasynda, ekeýi Mańǵystaý oblysynda anyqtalǵan. Zerthana jaǵdaıynda barlyǵy 834 synama zerttelip, onyń beseýinen tumaý vırýsy tabyldy.
Sońǵy esepti aptanyń ishinde elde 127 266 JRVI jaǵdaıy tirkeldi. Aldyńǵy aptada bul kórsetkish 140 273 bolǵan. Qyrkúıek aıynyń basynan beri JRVI-diń 760 182 jaǵdaıy anyqtaldy.
— Zerthanalyq monıtorıng basqa da respıratorlyq vırýstardyń taralýyn rastady. Atap aıtqanda, rınovırýstyq ınfektsııanyń — 68, maýsymdyq koronavırýstyq ınfektsııalardyń — 47, bokavırýstyq ınfektsııanyń — 50, paragrıptiń — 32, adenovırýstyq ınfektsııanyń — 27, respıratorlyq-sıntsıtıaldy ınfektsııanyń — 2 jáne metapnevmovırýstyq ınfektsııanyń 1 jaǵdaıy anyqtaldy, — delingen DSM habarlamasynda.
Halyqty tumaýǵa qarsy tegin vaktsınatsııalaý úshin «Grıppol®️ Plıýs» vaktsınasynyń 2,1 mln dozasy satyp alyndy. Onyń quramy Dúnıejúzilik densaýlyq saqtaý uıymynyń 2026–2027 jyldardaǵy epıdemııalyq maýsymǵa arnalǵan usynymdaryna sáıkes keledi. Vaktsına elimizdiń barlyq óńirine jetkizildi.
8 qazandaǵy jaǵdaı boıynsha tumaýǵa qarsy ekpeni 240 375 adam aldy.
— Birinshi kezekte tegin vaktsınatsııalaý qaýip toptaryna júrgiziledi. Olardyń qatarynda medıtsına qyzmetkerleri, júkti áıelder, dıspanserlik esepte turǵan balalar, jetim balalar, medıtsınalyq-áleýmettik mekemelerde turatyn adamdar men osy mekemelerdiń qyzmetkerleri, sondaı-aq epıdemıologııalyq kórsetilimder boıynsha basqa da sanattaǵy azamattar bar, — delingen habarlamada.
Densaýlyq saqtaý mınıstrligi vaktsınatsııalaý úshin qazan aıy qolaıly kezeń ekenin eske salady. Sebebi ekpeden keıin ımmýndyq qorǵanystyń qalyptasýyna shamamen eki apta qajet.
Vaktsınatsııalaý tumaýdyń aýyr ótý jáne asqyný qaýpin tómendetýge kómektesedi.
— Sonymen qatar qarapaıym profılaktıkalyq sharalardy saqtaý usynylady: qoldy únemi jýý, bólmelerdi jıi jeldetý jáne naýqas adamdarmen tyǵyz qarym-qatynastan aýlaq bolý.
Dene qyzýy kóterilip, jótel, tamaq aýrýy nemese respıratorlyq ınfektsııanyń basqa da belgileri paıda bolǵan jaǵdaıda úıde qalyp, ýaqytyly medıtsınalyq kómekke júginý jáne ózin-ózi emdeýmen aınalyspaý qajet, — delingen habarlamada.
Eske salsaq elde emhanalardyń jumysyn baǵalaý júıesi ózgeretini týraly jazǵan edik.
