Alǵashqy úsh jolaqty reversıvti jol qaı óńirde salynady
ASTANA. KAZINFORM — Aqmola oblysynda úsh jolaqty reversıvti qozǵalys qarastyrylǵan jol salynady. Bul týraly Kólik mınıstrliginiń baspasóz qyzmeti habarlady.
Kólik vıtse-mınıstri Maqsat Qalıaqparov Aqmola oblysyna is-saparmen baryp, Kókshetaý — Zerendi tasjolyndaǵy ortasha jóndeý jumystaryn tekserdi. Atalǵan jol boıynda elimizde alǵash ret reversıvti qozǵalys jolaǵy salynady.
Joba aıasynda joldyń eni 7 metrden 11 metrge deıin keńeıedi. Jóndeý jumystary tolyq aıaqtalǵan soń, úsh jolaqty qozǵalys júıesi iske qosylyp, onyń bir jolaǵy reversıvti bolady. Bul joldyń ótkizý qabiletin arttyryp, jol-kólik oqıǵalaryn aldyn alýǵa múmkindik bermek. Ásirese jazǵy maýsymda qozǵalys qarqyndylyǵy artqan kezde týrıster men jergilikti turǵyndar úshin bul jol yńǵaıly ári qaýipsiz bolady dep kútilip otyr.
— Jazǵy ýaqytta Zerendi kýrorttyq aımaǵyna baratyn kólik sany artatyny sózsiz. Jóndeý jumystary 47 shaqyrymdy qamtıdy. Qazir joba aıasyndaǵy jumystar belgilengen kestege saı júrip jatyr, — dedi vıtse-mınıstr.
Zerendi kýrorttyq aımaǵy — elimizdegi eń tanymal týrıstik baǵyttardyń biri. Munda jyl saıyn Qazaqstannyń túkpir-túkpirinen jáne alys-jaqyn shetelderden myńdaǵan týrıst kelip demalady.
— Jalpy 2025 jyly aýqymdy ortasha jóndeý baǵdarlamasy aıasynda respýblıkalyq mańyzy bar 7 myń shaqyrym jol jańartylmaq. Bul jumystar eń aldymen týrıstik áleýeti joǵary óńirlerge baǵyttalǵan. Atap aıtqanda, Rahmanov qaınary, Alakól, Qaıyńdy men Kólsaı kólderi, Baıanaýyl, Kendirli, Qorǵaljyn qoryǵy jáne Imantaý-Shalqar kýrorttyq aımaǵyna baratyn joldar jóndeýden ótedi, — delingen mınıstrlik habarlamasynda.
Aıta ketelik BQO-da joldy kútip ustamaǵan mekeme basshysyna aıyppul salynǵan edi.