Alǵashqy tsıfrlyq jedel medıtsınalyq kómek pýnkti Almaty oblysynda iske qosyldy

 Nysan halyq kóp shoǵyrlanatyn Qapshaǵaı jaǵajaıy aýmaǵynda ornalasqan jáne turǵyndar men týrısterge shuǵyl jaǵdaıda alǵashqy medıtsınalyq kómekti jedel alýǵa múmkindik beredi. Syrqattanǵan nemese zardap shekken azamat modýldik pýnktke kelip, arnaıy SOS batyrmasy arqyly jedel medıtsınalyq járdem stantsııasynyń dıspetcherimen birden baılanysa alady. Medıtsına qyzmetkeri qashyqtan modýldi ashyp, jedel járdem brıgadasy kelgenge deıin alǵashqy kómek kórsetý boıynsha nusqaýlyq beredi.

Kólemi 2×2,5 metr bolatyn modýl táýlik boıy jumys isteıdi jáne tótenshe jaǵdaılarda jedel áreket etýge arnalǵan. Onyń ishinde alǵashqy medıtsınalyq kómek kórsetýge qajetti dári-dármekter men zamanaýı jabdyqtar ornalastyrylǵan. Atap aıtqanda, defıbrıllıator, jaralardy alǵashqy hırýrgııalyq óńdeýge arnalǵan sterıldi bıks, jedel koronarlyq sındrom kezinde qoldanylatyn medıtsınalyq jınaq, brezent kórpe jáne tot baspaıtyn bolattan jasalǵan kýshetka bar.

Pýnkt úzdiksiz ınternetpen, 360 gradýs syrtqy beınebaqylaý kamerasymen, SOS dabyl júıesimen, qashyqtan basqarylatyn telemedıtsına keshenimen, aqparattyq dıspleımen jáne ishki beınekameralarmen jabdyqtalǵan. Dıspetcher beıne jáne aýdıobaılanys arqyly naýqastyń jaǵdaıyn baǵalap, jedel járdem brıgadasy kelgenge deıin alǵashqy kómek kórsetý boıynsha nusqaýlar beredi. Sondaı-aq pýnkttegi medıtsınalyq jabdyqtar men dári-dármekterdi paıdalaný tártibin túsindiredi.

Modýldiń syrtqy qaptamasy joǵary beriktigimen erekshelenetin HPL-panelder men tot baspaıtyn bolattan jasalǵan. Bul onyń ártúrli klımattyq jaǵdaılarǵa tózimdiligin jáne uzaq merzim qyzmet etýin qamtamasyz etedi. Almaty oblysy Densaýlyq saqtaý basqarmasynyń basshysy Erjan Súleımenovtiń aıtýynsha, joba óńirdegi shuǵyl medıtsınalyq kómektiń qoljetimdiligi men sapasyn arttyrýǵa baǵyttalǵan.

— Bir modýldik pýnkt táýligine shamamen 50 adamǵa deıin alǵashqy medıtsınalyq kómek pen keńes berý qyzmetin kórsete alady. Qajet bolǵan jaǵdaıda bul kórsetkish joǵary bolýy múmkin. Biz turǵyndarǵa shuǵyl medıtsınalyq kómekti qoljetimdi etip qana qoımaı, tsıfrlyq tehnologııalardy engizý arqyly qyzmet kórsetý sapasyn jańa deńgeıge kóterip otyrmyz. Aıta keterligi — mundaı formattaǵy modýldik jedel medıtsınalyq kómek pýnktteri Qazaqstanda alǵash ret iske qosylyp otyr, — dedi Erjan Súleımenov.

Joba aıasynda jyl sońyna deıin Almaty oblysynyń týrıstik jáne rekreatsııalyq aımaqtarynda barlyǵy 11 tsıfrlyq modýldik jedel medıtsınalyq kómek pýnktin ornatý josparlanǵan. Olar Qonaev qalasy men Qapshaǵaı jaǵalaýynda, «Túrgen» taý shańǵysy kýrortynda, «Oi-Qaragai Lesnaya Skazka» Mountain Resort-ta, «Aqbulaq» halyqaralyq týrıstik ortalyǵynda, «Han Táńiri» halyqaralyq alpınıstik lagerinde, «Arasan» shıpajaı-kýrorttyq aımaǵynda, sondaı-aq «Sharyn», «Іle-Alataýy», «Kólsaı kólderi» jáne «Altyn-Emel» ulttyq parkteri men «Tańbaly» memlekettik qoryq-murajaıy aýmaǵynda ornalastyrylady. Árbir pýnkt belgili bir týrıstik nysanǵa bekitilip, sol aýmaqtaǵy turǵyndar men kelýshilerge turaqty qyzmet kórsetedi.

— Týrıstik oryndarda demalyp júrgen azamat oqystan aýyr jaraqat alsa, nemese qan qysymy kóterilý, kún ótý, úsik shalý sııaqty jaǵdaılarǵa tap bolsa, osyndaı medıtsınalyq modýlge kirip, medıtsınalyq qyzmetkerdiń kómegine onlaın júgine alady. Joba tótenshe jaǵdaı týraly jedel habar berýge, medıtsına mamandarymen dereý baılanys ornatýǵa jáne jedel járdem kelgenge deıin qajetti kómekti uıymdastyrýǵa da múmkindik beredi, — dedi Almaty oblysy Densaýlyq saqtaý basqarmasynyń basshysy Erjan Súleımenov.

Jobany Almaty oblysynyń ákimdigi, oblystyq Densaýlyq saqtaý basqarmasy jáne Oblystyq jedel medıtsınalyq járdem stantsııasy birlesip júzege asyrýda. Joba halyqqa medıtsınalyq kómektiń qoljetimdiligin arttyrýǵa, týrıstik aımaqtardaǵy tótenshe jaǵdaılarda áreket etý ýaqytyn qysqartýǵa jáne óńirdiń densaýlyq saqtaý salasyna zamanaýı tsıfrlyq tehnologııalardy engizýge baǵyttalǵan.