Alǵashqy medıtsınalyq kómektiń jańa modeli: ne ózgerip jatyr

ASTANA. KAZINFORM — Qazirgi tańda elimizde 677 alǵashqy medıtsınalyq-sanıtarııalyq kómek nysany jumys isteıdi. Onyń 62%-y qalada, 38%-y aýyldyq jerlerde ornalasqan.   

Sońǵy jyldary medıtsına salasyndaǵy qyzmettiń sapasyn joǵarylatý úshin basqarý júıesine birqatar zamanaýı tásil engizildi. Bul ózgerister týraly «Alǵashqy medıtsınalyq-sanıtarlyq kómek júıesin jańǵyrtý» taqyrybynda ótken baspasóz konferentsııasynda Densaýlyq saqtaý mınıstrliginiń mamany baıandap berdi.

— Sońǵy jyldardaǵy negizgi jetistikterdiń biri — normatıvtik bazany jańartý jáne alǵashqy medıtsınalyq kómektiń basqarý júıesine zamanaýı tásilderdi engizý. Eń aldymen, bul normatıvtik-quqyqtyq aktilerdi jetildirý. Densaýlyq saqtaý mınıstrligi bıyl birqatar mańyzdy qujatty, buıryqty jańartý boıynsha júıeli jumys istep jatyr. Bul qujattar medıtsınalyq kómektiń sapasy men qoljetimdiligin arttyrýǵa baǵyttalǵan, — deıdi «Respýblıkalyq medıtsınalyq-sanıtarııalyq alǵashqy kómek ortalyǵy» ShJQ RMK dırektory Aıgúl Qasymova.

Endi dárigerlerdiń naýqasty qabyldaıtyn ýaqyty 6 saǵatqa deıin uzarmaq.

— Buǵan deıin qabyldaý 4–5 saǵat bolsa, endi bul ýaqyt 6 saǵatqa deıin uzartylyp otyr. Bul dárigerge patsıentti jan-jaqty qarap, tıimdi em taǵaıyndaýǵa, dınamıkalyq baqylaýdy sapaly júrgizýge jáne jańa baǵyttardy iske asyrýǵa múmkindik beredi, — deıdi mınıstrlik ókili.

Medıtsına mamandary bıyldan bastap tek aýrýdyń saldarymen ǵana emes sebebimen de aldyn ala kúresýge den qoıady.

— Alǵashqy medıtsınalyq kómektegi mańyzdy baǵyttardyń biri — aýrýlardyń aldyn alý jáne olardy erte anyqtaý. Sonymen qatar, naýqastardy emdeýdiń baǵyt-baǵdary qaıta qaraldy jáne medıtsınalyq kómek kórsetý aktsentteri ózgertildi. Medbıkeniń patsıentti jeke qabyldaý júıesi engizildi, dınamıkalyq baqylaýdaǵy patsıentterdiń beıindi mamandarǵa ózdiginen jazylýyna múmkindik berildi, — deıdi Aıgúl Qasymova.

Endi medıtsına qyzmetkerleriniń júktemesi azaıyp, yntalandyrý sharalary keńeıtiledi.

— 278-buıryq aıasynda kapıtatıvtik normatıvtik tólem mólsherlemesi boıynsha yntalandyrý komponentin esepteýdiń jańa ádistemesi engizildi. № 49 standart jobasyn iske asyrý bastaldy, onda úıge shaqyrtý boıynsha kórsetilimder ońtaılandyryldy. Mobıldi brıgadalardyń róli keńeıtilip jatyr, shuǵyl medıtsınalyq kómek kórsetetin kabınetter ashylyp, sondaı-aq keıbir ókilettikterdi beıindi mamandardan jalpy praktıka dárigerlerine, al dárigerlerden medbıkelerge berý boıynsha jumys istelip jatyr, — deıdi spıker.

Aıta keteıik, buǵan deıin kúz ben kóktem mezgilinde ınsýlt alý qaýpi joǵary ekenin jazǵan edik.