Alǵashqy Azııa oıyndarynda jeńis tuǵyrynan kóringenime qýanyshtymyn — Dmıtrıı Holmogorov
AIChI.KAZINFORM — Qazaqstandyq baıdarka jáne kanoe esýshi Dmıtrıı Holmogorov Japonııada ótip jatqan HH jazǵy Azııa oıyndarynda qola júlde jeńip aldy. Sportshy jarystan keıin Kazinform tilshisine qýanyshty kóńil-kúıin bólisti.
Sportshy kásibı mansabynda alǵash ret osyndaı aýqymdy básekede óner kórsetip jatqanyn aıtty.
— Jalpy, jarys nátıjesine kóńilim tolady. Bul meniń alǵashqy Azııa oıyndarym. Mundaı aýqymdy jarysta alǵash ret baq synap turmyn, jáne jeńis tuǵyrynan kóringenime qýanyshtymyn. Maǵan qoldaý kórsetken, onymen qatar maǵan sengen jáne qasymnan tabylǵan jaqyndaryma alǵys aıtamyn, — dedi Dmıtrıı.
Qazaqstandyq eskekshi baıraqty dodaǵa tyńǵylyqty daıyndalǵanyn tilge tıek etti.
— Jarysqa tyńǵylyqty daıyndaldym. Búgin kún jaýyndy boldy, aýa raıy jaǵdaıy men úshin aıtarlyqtaı qıyndyq týdyrǵan joq. Eń bastysy — ózimdi qalaı sezingenim jáne kóńil-kúıim edi, — dedi sportshy.
Osyǵan deıin habarlaǵanymyzdaı, Dmıtrıı Holmogorov baıdarka jáne kanoede esý sportynan erler arasynda 500 metr qashyqtyqty 1 mıný 44.453 sekýndta baǵyndyryp, márege úshinshi bolyp jetti.
Sonymen qatar, Sergeı Emelıanov jáne Rýfına Iskakova Azııa oıyndarynyń qola júldegeri atandy.
Qazaqstan Azıadanyń altynshy jarys kúninde bes qola medal jeńip aldy.
