Alǵashqy aıaz: Kommýnaldyq apat bolǵan óńirlerde jóndeý jumysy qalaı júrip jatyr
Kesheli beri elimizdiń birneshe óńiri jylýsyz, sýsyz qaldy. Energetıka mınıstrligi men jergilikti organdar máseleni tolyq ári tez sheshýdiń amalyn qarastyryp jatyr, dep habarlaıdy Kazinform.
Qazirgi tańda Atyraýdy sýmen qamtý tolyq qalpyna kelgen.
Atyraý qalasyndaǵy, oǵan taıaý ornalasqan eldi mekender men Maqat aýdanynyń tutynýshylaryna sýyq sý berildi.
Qazir sý qubyryndaǵy qysym birqalypty.
«Atyraý oblysy sý arnasy» kommýnaldyq memlekettik kásipornynyń basshysy Meıirim Qalaýıdiń aıtýynsha, 10 jeltoqsanda jergilikti ýaqytpen saǵat 16:00 shamasynda tutynýshylarǵa sý berile bastaǵan.
Al, saǵat 19:00-de qubyrdaǵy qysymdy qalpyna keltirý aıaqtalǵan.
Sondaı-aq eki kún buryn Kókshetaýda 40-tan astam úı jylýsyz qaldy.
Kókshetaýdaǵy «Kapıtal» turǵyn úı kesheniniń mańynda dıametri 700 mm bolatyn jylý qubyry jarylǵan.
10 jeltoqsan kúni saǵat 19.00 shamasynda Kókshetaýda Sábataev pen Saǵdıev kósheleriniń qıylysyndaǵy jylý trassasynda apat boldy.
Osy ýaqytta Sábataev kóshesi, № 82 turǵyn úı aýmaǵyndaǵy 700 mm dıametrli №1 jylý trassasyndaǵy aqaý anyqtaldy.
Keshe Temirtaýda QarMAES-1 sorǵy stansasynda apattyq jaǵdaı boldy.
Oqıǵa saldarynan stansa qazandyqtary rezervtik otynǵa aýystyryldy.
Apat temperatýralyq kesteniń tómendeýine ákeldi.
Búgin Temirtaýdaǵy Eski qala aýdanynda jylý qalpyna keltirildi.
Atalmysh shaǵyn aýdannyń úılerinde QarMAES-1-degi apatqa baılanysty temperatýralyq rejım tómendegen bolatyn.
Sonymen qatar Ekibastuz JEO-da qatty otynmen jumys isteıtin qazandyqtar jumysy da tolyq qalpyna keldi.
10 jeltoqsan kúni saǵat 19.30-da Ekibastuz JEO-da qubyrdaǵy kúldi shaıý nátıjesindegi sý basqan barlyq ýchaskeler qurǵatyldy. Qazir jylý temperatýrasyn kóterý úshin barlyq amaldar jasalyp jatyr.
Pavlodar oblysy ákiminiń baspasóz qyzmeti jazǵandaı, jóndeý brıgadalary eki elektr qozǵaltqyshty aýystyrdy, sorǵy kúl qubyrynyń jumysy qalpyna keldi.
Keshe Rıdderdegi jylý qazandyǵynda apat bolyp, ol ýaqytsha qyzmetin toqtatty. Júrgizilgen jumys nátıjesinde, qazirgi sátte jylý tolyq emes qýatynda berilip jatyr.
«19:00-de jylý qazandyǵy qaıta iske qosyldy. 20:00-de jylý temperatýrasy 73 gradýsty kórsetip turdy. 23:00-de jylý temperatýrasyn qalypty kórsetkishke deıin jetkizý josparlanǵan» delingen habarlamada.
Aıta ketsek, keshe elimizde birneshe óńir sýsyz jáne jylýsyz qalǵanyn habarlaǵan bolatynbyz.
Keıin Energetıka mınıstrligi Aqtaý, Balqash jáne Ekibastuzda jylý júıelerin jóndeý jumystary aıaqtalǵanyn jetkizdi.
Sondaı-aq, atalǵan vedomstvo jylý jelilerin qalpyna keltirý jumystary jergilikti atqarýshy organdardyń nazarynda jáne jaǵdaı mınıstrliktiń de baqylaýynda ekenin jetkizdi.
Rıdderdegi jylý ortalyǵynda apat bolǵany jaıly aqparat – jalǵan.
Rıdder qalasynyń ákimi Dáýlet Batyrbaev jylý elektr ortalyǵynda apat bolǵany jaıly aqparattyń shyndyqqa janaspaıtynyn málim etti.
