«Alǵashqy áskerı daıyndyq» pániniń ataýy men mazmuny ózgeredi
ASTANA. KAZINFORM - Mekteptegi «Alǵashqy áskerı jáne tehnologııalyq daıyndyq» pániniń ataýy men mazmuny ózgeredi. Bul týraly Qorǵanys mınıstrligi Áskerı bilim jáne ǵylym departamentiniń bastyǵy, polkovnık Murat Oljabaev aıtty.
- Bilim berý uıymdarynda áskerı is negizderin oqytýdyń mindetti páni – bastapqy áskerı jáne tehnologııalyq daıyndyq. Qorǵanys mınıstrligi bilim berý uıymdarynda bastapqy áskerı daıyndyqty uıymdastyrýǵa jergilikti áskerı basqarý organdary arqyly kómek kórsetedi. Bul organdar Bas shtabtyń Uıymdastyrý-jumyldyrý jumystary departamentine tikeleı baǵynady, - dedi ol Ortalyq kommýnıkatsııalar qyzmetindegi brıfıngte.
Onyń atap ótýinshe, búginde Májilis depýtattary bastapqy áskerı jáne tehnologııalyq daıyndyq pániniń oqytýshylaryna qoıylatyn talaptardy kúsheıtý boıynsha usynystar engizdi. Atap aıtqanda, olar áskerı qyzmet ótkerý nemese áskerı kafedrada oqý tájirıbesiniń bolýy mindetti dep tanýdy usynyp otyr. Osyǵan baılanysty, qoldanystaǵy zańnamaǵa ózgerister men tolyqtyrýlar engizý jumystary júrgizilýde. Qazirgi ýaqytta zań jobasy Májiliste qaralýda jáne birinshi oqylymnan ótti.
- Qorǵanys mınıstrligi «Alǵashqy áskerı jáne tehnologııalyq daıyndyq» pániniń oqý baǵdarlamasyn «Otan qorǵaýshy» dep ózgertý jóninde pılottyq joba usyndy. Sonymen qatar, osy pánniń taqyryptyq jospary ázirlendi, - dedi departament bastyǵy.
Murat Oljabaevtyń dereginshe, jańa oqý baǵdarlamasyna mynadaı bólimder engiziledi:
• memlekettiń qaýipsizdigi men qorǵanysynyń quqyqtyq negizderi
• Qarýly kúshter jáne Áskerı doktrına
• áskerı daıyndyq negizderi
• áskerı qyzmet negizderi
• aqparattyq qaýipsizdik negizderi
• áskerı robottar jáne jasandy ıntellekt
• ómir qaýipsizdiginiń negizderi
• oqý-dala modýli
- «Otan qorǵaýshy» pániniń jańa oqý baǵdarlamasyn engizý 2026-2027 oqý jyldaryna josparlanǵan. Qazirgi ýaqytta ol Oqý-aǵartý mınıstrliginde talqylaý kezeńinde, - dedi ol.
Buǵan deıin bıyl Baýyrjan Momyshuly men Talǵat Bıgeldınov atyndaǵy áskerı kolledjder ashylatynyn jazǵan edik.