Alǵashqy áskerı daıyndyq pánin oqytý tártibi ózgertildi
ASTANA. KAZINFORM — Qorǵanys mınıstriniń buıryǵymen alǵashqy áskerı daıyndyq pánin oqytý erejelerine ózgerister engizildi.
Qujatqa sáıkes, 2026 jylǵy 1 qyrkúıekten bastap alǵashqy áskerı daıyndyq jalpy orta, tehnıkalyq jáne kásiptik bilim berý uıymdarynda mindetti oqý páni retinde engiziledi.
Baǵdarlama (pán) — jastardy áskerı qyzmetke daıyndaýǵa jáne áskerge deıingi jastardy áskerı-patrıottyq rýhta tárbıeleýge baǵyttalady. Onyń quramyna teorııalyq jáne praktıkalyq daıyndyq, oqý-dalalyq (lagerlik) jıyndar ótkizý, sondaı-aq ártúrli deńgeıdegi (aýdandyq, oblystyq, respýblıkalyq mańyzy bar qala jáne astana deńgeıinde) alǵashqy áskerı daıyndyq boıynsha jarystar ótkizý kiredi.
Pánniń negizgi maqsaty — áskerı isterdiń bastapqy daǵdylaryn meńgerý, dene tózimdiligin, moraldyq-psıhologııalyq turaqtylyqty jáne áskerı boryshty oryndaýǵa daıyndyǵyn damytý, sondaı-aq oqýshylarda otansúıgishtik sezimin qalyptastyrý.
Pánniń negizgi mindetteri:
— Oqýshylarda Otan aldyndaǵy joǵary jaýapkershilik sezimin, memlekettik rámizderge, ásker jáne áskerı qyzmetke qurmet pen áskerı-patrıottyq tárbıeni qalyptastyrý;
— Áskerı qyzmetke daıyndyq, áskerı istiń negizderin, saptyq, atys, taktıkalyq jáne áskerı-medıtsınalyq daıyndyqty meńgerý;
— Kúızeliske tózimdilik, tózim, uıymdasa bilý, tártip, fızıkalyq jáne psıhologııalyq qasıetterdi damytý;
— Jastardyń áskerı qyzmetke qyzyǵýshylyǵyn arttyrý jáne tájirıbege baǵyttalǵan oqytý arqyly áskerı mamandyqtyń negizderin meńgerýge jaǵdaı jasaý.
Sabaqtar áskerge deıingi jastaǵy oqýshylarmen negizgi orta bilim berý bazasynda ótkiziledi. Bul pán jalpy orta, tehnıkalyq jáne kásiptik bilim berý baǵdarlamalaryn júzege asyratyn (arnaıy uıymdardan basqa) barlyq bilim berý uıymynda, menshik nysany men vedomstvolyq baǵynystylyǵyna qaramastan júrgiziledi. Pándi alǵashqy áskerı daıyndyq muǵalimi oqytady.
Sabaq aptasyna keminde bir ret ótkiziledi. Mektepte bul pánge 64 oqý saǵaty bólinedi:
— 10-synypta keminde 30 saǵat;
— 11-synypta keminde 32 saǵat.
Tehnıkalyq jáne kásiptik bilim berý oshaqtarynda keminde 136 oqý saǵaty, onyń ishinde keminde 30 saǵaty oqý-dalalyq sabaqtarǵa bólinedi. Sabaq uldar men qyzdarǵa birge ótkiziledi, biraq «Medıtsınalyq bilimniń negizderi» bólimi qyzdarǵa jeke uıymdastyrylady jáne ony medıtsına qyzmetkeri júrgizedi. Odan bólek, bilim berý uıymdary áskerı-patrıottyq jumys josparyn ázirleýi tıis. Oǵan áskerı qyzmetshiler jáne ardagerlermen kezdesýler, áskerı bólimderge ekskýrsııa, áskerı-patrıottyq klýbtar men jarystarǵa qatysý jatady.
Buıryq 2025 jylǵy 21 qarashadan bastap kúshine enedi.
Jyl basynda alǵashqy áskerı daıyndyq páni muǵalimderiniń mártebesi artatyny týraly habarlaǵan edik.