Alǵashqy altyn, jańarǵan rekord, 6 dúrkin chempıondyq: Prezıdent qaı sportshylardyń jetistigin erekshe atady
ASTANA. KAZINFORM — Memleket basshysy Qasym-Jomart Toqaev Azıada jáne Azııa paraoıyndarynyń el namysyn abyroımen qorǵaǵan sportshylardyń jetistikterine toqtalyp ótti.
Óz quttyqtaýynda Prezıdent sportshylarymyz jahandyq arenada joǵary kórsetkishke qol jetkizip, memleketimizdiń bedelin kóterip júrgenin aıtty.
— Osy oraıda, paraoıyndarda 100 metrge júgirýden Azııa rekordyn jańartqan Aısulý Súleımenovanyń qaısarlyǵyn erekshe atap ótken jón. Aısulý Súleımenova qazaqtyń rýhy bıik, namysy zor batyr qyzdarynyń jolyn laıyqty jalǵastyryp keledi. Ol taǵdyrdyń qıyn synaǵyna tap bolsa da, tek qana alǵa umtylyp, kópke úlgi bolyp júr. Qazir Quryltaı depýtaty retinde azamattyq boryshyn adal atqaryp, el ıgiligi úshin qyzmet etip keledi. Qazaq «Kúsh — bilekte emes, júrekte» deıdi. Rasynda asqaq arman men muqalmas jiger toǵysqan jerde alynbaıtyn asý joq. Sondyqtan parasportshylardyń boıyndaǵy jankeshtilik pen tabandylyq árdaıym zor qurmetke laıyq, — dedi Qasym-Jomart Toqaev.
Sondaı-aq Azııa oıyndarynda baq synaǵan 21 jastaǵy sportshy Temirlan Tileýlestiń esimi otandyq jáne álemdik sport tarıhynda qalatyny sózsiz.
— Ol taekvondodan el tarıhyndaǵy alǵashqy altyn medaldi jeńip aldy. Boksshylarymyz Tórehan Sabyrhan men Aıbek Oralbaı chempıon atanyp, el namysyn abyroımen qorǵady. Qazaqstannyń maqtanyshy atanǵan taǵy bir sportshymyz — Sofıa Berýltseva. Sofıa Tokıo Olımpıadasynda karateden qola júlde alyp, memleketimizdiń abyroı-bedelin bıiktetti. Ol osydan tórt jyl burynǵy Azııa oıyndarynda altyn medal enshiledi. Endi, mine, Japonııa tórinde naǵyz sport sheberi ekenin taǵy bir márte dáleldep, Azıadanyń eki dúrkin chempıony atandy. Qazaqstan tarıhynda alǵash ret Azııa oıyndarynyń alty dúrkin chempıony atanǵan Alekseı Lýtsenko aramyzda otyr. Ol Japonııada ótken Jazǵy Azııa oıyndarynda jekeleı jáne toptyq velojarysta qos altyn medaldi jeńip aldy. Alekseı Lýtsenko jyldar boıǵy tabandy eńbeginiń, temirdeı tártibiniń jáne qaısar mineziniń arqasynda tamasha tabysqa jetti, — dedi Prezıdent.
Paraazııa oıyndarynyń eki márte chempıony atanǵan Davıd Degtıarev te kásibıliktiń, erliktiń ári jeńiske degen qushtarlyqtyń jarqyn úlgisin kórsetti. Ótken jarystarda Azııanyń jańa rekordyn ornatyp, jeńis tuǵyryna kóterildi.
— Paýerlıfter Davıd Degtıarev elimizdiń jáne álemniń eń ataqty atletteriniń biri — eki Jazǵy Paralımpıada oıyndarynyń jeńimpazy, úsh dúrkin álem chempıony. Sportshylarymyz óz jetistikteri arqyly Qazaqstannyń Týyn halyqaralyq arenada bıikte jelbiretip júr, — dedi Prezıdent.
Aıta keteıik, Aqordada Prezıdent Azııa oıyndary jáne Azııa paraoıyndarynyń jeńimpazdary men júldegerlerin marapattady.
Japonııada ótken XX jazǵy Azııa oıyndary aıaqtalady. Qazaqstan quramasy 84 medal (12 altyn, 24 kúmis jáne 48 qola) oljalap, 46 eldiń ishinde jalpykomandalyq esepte 8-orynǵa turaqtady.
Al Azııa Paraoıyndarynda Qazaqstan 50 medal jeńip alyp, úzdik ondyqqa endi.
Buǵan deıin Memleket basshysy sport salasy árdaıym memlekettiń basty nazarynda bolatynyn aıtqan edi.
