Alǵashqy AES qurylysyn tezdetý qajet – Memleket basshysy

ASTANA. KAZINFORM – Prezıdent Qasym-Jomart Toqaev Úkimet pen Parlamentke ekinshi ıadrolyq stansany qaı aımaqta salý qajettigi jóninde usynym berýdi tapsyrdy.

− Energııa tapshylyǵy artyp keledi. Sondyqtan alǵashqy Atom elektr stansasynyń qurylysyn tezdetý qajet. Jalpy elimizde ıadrolyq klaster qurý isin qolǵa alý kerek. Bul elimizdiń bolashaqta oıdaǵydaı damýyna qatysty asa mańyzdy mindet, − dedi Memleket basshysy Úkimettiń búgingi keńeıtilgen otyrysynda.

Sonymen birge, Prezıdent Úkimetke «Samuryq-Qazyna» qorymen birlesip, atom salasyn damytýdyń uzaq merzimge arnalǵan josparyn ázirleýdi tapsyrdy.

− Naqty nátıje kerek. Jan-jaqty taldaý júrgizip, atom elektr stansalaryn salýǵa barynsha qolaıly jerlerdi, sondaı-aq zamanaýı jáne qaýipsiz tehnologııalardy anyqtaý qajet. Úkimet pen Parlament ekinshi ıadrolyq stansany qaı aımaqta salý qajet ekeni jóninde maǵan usynys berýi kerek. Biraq atap ótkim keledi: elimizge ıadrolyq qýat kerek, onsyz Qazaqstan keleshekte oıdaǵydaı damı almaıdy. Qýat degenimiz – búkil ekonomıkanyń damýy degen sóz. Ekinshiden, qýat jetkilikti bolsa, barlyq aımaqtar gúldenip, órkendeı túsedi, halyqtyń turmysy jaqsarady. Bul – aıdan anyq, − dedi Memleket basshysy.

Premer-mınıstr Oljas Bektenov Úkimettiń keńeıtilgen otyrysynda elde salynýy múmkin ekinshi jáne úshinshi AES qurylysyna arnalǵan aýmaqtardy anyqtaý jumystary aıaqtalýǵa jaqyn ekenin aıtqan bolatyn.