Alǵashqy AES quny 14 mlrd dollar bolýy múmkin – Almasadam Sátqalıev

ASTANA. KAZINFORM – Atom energetıkasy jónindegi agenttik tóraǵasy Almasadam Sátqalıev elde salynatyn alǵashqy AES-tiń boljamdy qunyn atady.

- Quny tehnıkalyq-ekonomıkalyq negizdeme boıynsha belgili bolady. Bizde qazir venderler usynǵan ındıkatıvti ólshemder bar. Qazir ol usynystaryn jarııa ete almaımyz. Óıtkeni resmı kelisimdermen qorǵalǵan. Jalpy alǵanda, álemdik tájirıbege súıensek, mundaı deńgeıdegi stansa quny shamamen 14 mlrd dollar bolady, - dedi Almasadam Sátqalıev.

Sondaı-aq, ol ekinshi AES-ti Qytaı salady dep aıtylǵan aqparatqa túsinikteme berdi.

- AES salýmen baılanysty árbir joba ózinshe biregeı. Báriniń quzyreti, baıypty tájirıbesi bar. «Rosatomdy» birinshi jobaǵa tańdap alýymyzdyń ózine qurylystyń merzimi boıynsha usynǵan nusqasymen baılanysty boldy. Qytaı tarabymen kelissóz ótkennen keıin ǵana ekinshi AES qurylysy týraly aıtýǵa bolatyn shyǵar, - dedi agenttik tóraǵasy.

Sondaı-aq, ol bir AES-ti salýǵa orta eseppen 7 jyldaı ýaqyt ketetinin aıtty.

Buǵan deıin Atom energııasy jónindegi agenttik pen «Rosatom» AES salý jónindegi jol kartasyn bekitti.