Alǵashqy AES-ke úzdik ataý berý konkýrsy bastaldy

ASTANA. KAZINFORM – 25 qyrkúıek kúni saǵat 12:00–de Qazaqstanda alǵashqy atom elektr stantsııasyna úzdik ataý berý boıynsha jalpyhalyqtyq konkýrs bastaldy. 

Konkýrsqa árbir qazaqstandyq eGov Mobile arqyly qatysa alady.

Saýalnama eGov Mobile mobıldi qosymshasynda júrgiziledi. Basty paraqshada «AES-ke ataý usynyńyz» banneri ornalastyrylǵan, al paıdalanýshylarǵa konkýrstyń bastalǵany týraly push-habarlama jiberiledi.

Bastamanyń maqsaty — bolashaq stantsııaǵa tarıhı, mádenı jáne ulttyq mańyzyn aıqyn kórsetetin ataý tańdaý.

Qatysý úshin:
* tildi tańdaý (qazaq nemese orys);
* óz nusqasyn usyný;
* ataýdyń maǵynasyn qysqasha sıpattaý (mindetti emes);
* konkýrstyń resmı qaǵıdalarymen tanysqanyn rastaý.

Usynystardy qabyldaý 2025 jylǵy 10 qazandaǵy saǵat 23:59–ǵa deıin jalǵasady.

— Konkýrs qaǵıdalarymen Atom energııasy jónindegi agenttiktiń resmı saıtynda jáne vedomstvonyń áleýmettik jelilerindegi paraqshalarynda tanysýǵa bolady. Uıymdastyrýshylar barlyq azamatty elimizdiń energetıka salasynyń tarıhyna úles qosyp, Qazaqstannyń alǵashqy AES-na ataý usynýǵa shaqyrady, — delingen habarlamada. 

Aıta ketelik 25 qyrkúıekte eGov portalynda AES ataýyn usynýǵa arnalǵan bólim ashylatyny týraly jazǵan edik.