Alǵashqy AES-ke úzdik ataý berý konkýrsy 25 qyrkúıekte bastalady

ASTANA. KAZINFORM – Búgin Atom energııasy jónindegi agenttiginde eldegi alǵashqyatom elektr stantsııasyna úzdik ataý berý jónindegi jalpyulttyq konkýrs ótkizý komıssııasynyń alǵashqy otyrysy ótti. 

Komıssııa quramyna qoǵam ókilderi, kreatıvti ındýstrııa mamandary, sondaı-aq atom energetıkasy, fılologııa jáne tarıh salasyndaǵy sarapshylar kirgen.

Otyrys barysynda komıssııa músheleri uıymdastyrý máselelerin qarastyryp, jalpyulttyq konkýrsty ótkizý erejelerin bekitti.

— Qazaqstan azamattarynyń barynsha kóp qamtylýy úshin AES-ke úzdik ataý berý boıynsha usynystar eGov Mobile qosymshasy arqyly qabyldanady. Konkýrstyń atom salasy qyzmetkerleri kúni qarsańynda bastalýy — ındýstrııanyń Qazaqstannyń áleýmettik-ekonomıkalyq damýyna qosyp otyrǵan úlesiniń aıqyn dáleli, — dep Atom energııasy jónindegi agenttiginiń tóraǵasy Almasadam Sátqalıev azamattardyń bul protseske qatysýynyń mańyzdylyǵyn atap ótti.

Talqylaýlardyń qorytyndysy boıynsha komıssııa konkýrstyń ótkizilý merzimderin bekitti:
* 25 qyrkúıek — konkýrstyń bastalýy týraly resmı habarlandyrý;
* 25 qyrkúıekten 10 qazanǵa deıin — eGov Mobile qosymshasy arqyly usynystardy qabyldaý;
* 11–20 qazan aralyǵy — kelip túsken usynystardy taldaý;
* qazan aıynyń sońyna deıin AES-tiń úzdik ataýyn anyqtaý.

AES-ke úzdik ataý berý jónindegi jalpyulttyq konkýrstyń erejeleri Atom energııasy jónindegi agenttiginiń resmı saıtynda jáne Telegram arnasynda jarııalanady.

Agenttik atap ótkendeı, konkýrs ashyq ári aıqyn ótedi. Árbir azamat AES-ke óz ataýyn usyna alady, al komıssııanyń qorytyndy sheshimi qazan aıynyń sońyna qaraı belgili bolady.

Aıta ketelik Memleket basshysy Qasym-Jomart Toqaev elimizde ekinshi, tipti úshinshi atom elektr stantsııasynyń qurylysyn qazirden bastap josparlaý kerektigin málim etken edi.