Alǵashqy AES-ke tartylatyn 14 mlrd dollardyń neshe paıyzyn qazaqstandyq kompanııalar ıgeredi

ASTANA. KAZINFORM — Premer-mınıstr Oljas Bektenov Úkimet otyrysynan keıin ótip jatqan baspasóz máslıhatynda Qazaqstandaǵy alǵashqy atom elektr stansasyn salýǵa tartylady delingen 14 mlrd dollardyń neshe paıyzyn otandyq kompanııalar ıgerýi múmkin ekenin aıtty.

— Qurylysqa barynsha qazaqstandyq kompanııalardy tartamyz. Biraq áli naqty tsıfrlardy aıtý múmkin emes. Óıtkeni jobalyq-smetalyq qujattar daıyn emes. Daıyn bolǵannan keıin naqty tsıfrlar paıda bolady. Sonda aıta alamyz. Biraq eń basty qaǵıdat — qazaqstandyq kompanııalardy tartý, — dedi Oljas Bektenov.

Premer-mınıstrdiń birinshi orynbasary Roman Sklıar ol jobalyq-smetalyq qujattar kelesi jyly ǵana daıyn bolatynyn aıtty.

— Tehnıkalyq-ekonomıkalyq negizdeme jeltoqsan aıyna qaraı daıyn bolady. Al jobalyq-smetalyq qujattar kelesi jyly daıyndalady, — dedi vıtse-premer.

Sondaı-aq, Roman Sklıar alǵashqy AES-tiń 14 mlrd dollar bolatyny Atom energetıkasy jónindegi agenttiktiń esebi ekenin, joba qujattaryn naqtylaý kezinde bul san ózgerýi múmkin ekenin qosty.

Eske salsaq, Atom energetıkasy jónindegi agenttik tóraǵasy Almasadam Sátqalıev Parlament palatalarynyń birlesken otyrysynyń aldynda elde salynatyn alǵashqy AES-tiń boljamdy qunyn ataǵan bolatyn.