Alǵashqy AES ataýyn tańdaý ońaı bolmaıdy — sarapshy pikiri

ASTANA. KAZINFORM — Qazaqstandaǵy tuńǵysh AES ataýyna 20 myńnan asa usynys tústi. Bul týraly Jibek Joly arnasynyń «Búgin LIVE» baǵdarlamasyna qonaq bolǵan AES jónindegi sarapshy málimdedi. 

— Atom elektr stantsııasy — tek bir óndiris orny emes, ol — iri jáne joǵary tehnologııalyq sala. Bul salada ǵalymdar, hımıkter, fızıkter, energetıkter jáne kóptegen jastar eńbek etedi. Men de osy salanyń mamanymyn, — deıdi Baǵdat Qadyrov.

Sarapshynyń aıtýynsha, Qazaqstandaǵy atom salasy qaıta jandanyp keledi.

— 1999 jyly Aqtaýdaǵy AES jabylǵan kezde, kóptegen maman, ásirese hımıkter men fızıkterdiń bolashaǵy joq sııaqty kórindi. Alaıda, 25 jyl ótken soń elimizde atom energetıkasy qaıta jandanyp jatyr, bul biz úshin úlken qýanysh. Qazir jańa stantsııa salynǵaly jatyr. Al bizden keıingi urpaq osy salada jumys istep, elimizdiń damýyna úles qosady dep senemin, — deıdi ol.

Baǵdat Qadyrov AES ataýyn tańdaý protsesine de toqtaldy.

— AES-tiń ataýyn jarııa baıqaý arqyly tańdaý — demokratııalyq turǵydan óte tıimdi sheshim. Oǵan tek ýran salasynyń mamandary ǵana emes, sonymen qatar tarıhshylar, etnograftar, sarapshylar, blogerler jáne halyq qatysady. Bul — óte durys ári ádil tásil dep esepteımin, — deıdi sarapshy.

Búginde usynystardy qarastyrý úshin arnaıy komıssııa qurylǵan.

— Onyń quramyna atom energetıkasy agenttiginiń ókilderi, memlekettik qyzmetkerler, etnograftar, tarıhshylar, blogerler, jastar jáne kreatıvti ındýstrııa ókilderi kiredi. Olar usynylǵan ataýlardy tarıhı, etnografııalyq jáne kreatıvti aspektiler boıynsha jan-jaqty saraptaıdy, — deıdi ol.

Baǵdat Qadyrov baıqaýǵa qatysý sharttaryn da túsindirip ótti.

— Baıqaýǵa kez kelgen adam e-Gov mobile arqyly qatysyp, óz usynysyn jibere alady. Alaıda usynys tek ataý ǵana emes, onyń mánin túsindiretin sıpattamamen birge berilýi tıis. Komıssııa bul usynystardy muqııat qarastyryp, sońynda eń qolaıly ári maǵynaly ataýdy tańdaıdy, — deıdi sarapshy.

Onyń aıtýynsha, halyq belsendilik tanytyp otyr.

— Qazirgi tańda 20 myńnan astam usynys kelip tústi. Áli de jańa ataýlar usynylyp jatyr. Sondyqtan komıssııa músheleri úshin durys ataýdy tańdaý ońaı bolmasy anyq, — deıdi Baǵdat Qadyrov.

Aıta keteıik, 2026 jyldan bastap Frantsııa men Koreıa ýnıversıtetteri elde AES mamandaryn daıarlaıdy.