Alǵash ret júzdegen Gaza turǵyny qıraǵan meshitte juma namaz oqydy

ASTANA. KAZINFORM — Gaza turǵyndary uzaq aılardan keıin alǵash ret qıraǵan meshitteriniń arasynda namazǵa jyǵyldy, dep jazady Anadoly.

Júzdegen palestınalyq  Izraıldiń eki jylǵa jalǵasqan shabýyldary saldarynan tolyǵymen nemese jartylaı qıraǵan meshitterdiń ornynda qulshylyq jasady.

Gaza úkimetiniń baspasóz qyzmetiniń málimetinshe, Izraıl 835 meshitti tolyqtaı qıratqan, al taǵy 180 meshitke jartylaı zaqym kelgen. Qıraǵan dinı ǵımarattardyń ishinde tarıhı nysandar da bar.

Keı aýdannyń turǵyndary qaıta bas qosyp, qıraǵan meshittiń qaldyqtaryn ózderi tazalap, jerge jaıma men kilemder tósep, juma namazǵa jyǵyldy.

Namaz bastalǵanǵa deıin qırandylar arasynda azan shaqyryldy.

Izraıl armııasy eki jyldyń ishinde Gaza sektoryna 200 myń tonna jarylǵysh zat tastaǵan, sonyń saldarynan ınfraqurylymnyń shamamen 90%-y qıratylyp, eki mıllıonǵa jýyq beıbit turǵyn qonys aýdarýǵa májbúr bolǵan.

Gaza turǵyny Ǵalıb an-Nımr meshitterde qaıtadan namaz oqý — uzaq jyldar boıy bastan ótken qıyndyqtar men jaqyndaryn joǵaltqannan keıingi tynyshtyqtyń belgisi ekenin aıtty.

Taǵy bir palestınalyq, Abý Kaıd Abý Ası, birge namaz oqyǵaly kóp ýaqyt ótkenin aıtyp, búgingi kún barlyǵy úshin erekshe jáne mańyzdy ekenin aıtty.

Osydan buryn Gaza úkimeti Izraıldiń eki jylǵa sozylǵan shabýyldary saldarynan sektor tarıhtaǵy eń iri gýmanıtarlyq daǵdarysqa ushyraǵanyn habarlap, soǵystan keıin 20 myń jarylmaǵan oq-dári qalǵanyn aıtty.