Alǵash ret «The Spirit of Astana» festıvali ótedi
ASTANA. QazAqparat - Astanada 23-24 maýsymda «Báıterek» monýmentiniń aldyndaǵy alańda «The Spirit of Astana 2017» qazirgi zamanǵy etnıkalyq mýzyka festıvali ótedi. Mádenı shara elorda qalasynyń ákimdigimen birlesip ótkiziledi.
Tengri FM Ulttyq qazaqstandyq radıostantsııasymen 2012 jyly bekitilgen mýltımádenıetti joba qazaq jerinde qazirgi zamanǵy etnıkalyq mýzyka óneriniń jarqyn ókilderiniń basyn qosyp, qala turǵyndary men qonaqtaryn Uly Dala halqynyń jáne álemniń murasymen tanystyrady. Astanadaǵy festıval qala ákimdiginiń qoldaýymen uıymdastyrylady.
Eki kún boıy qonaqtar jaryqtyq mýzykalyq shoýdy tamashalaıdy. Sahna tórinde Afrıka, AQSh, Makedonııa, Grýzııa, Vengrııa, Reseı, Qazaqstan, Bashqurtstan, Býrıatııa, Týva jáne basqa da memleketterden kelgen 14 mýzykalyq ujym óz ónerlerin ortaǵa salady. Sahnadaǵy is-qımyldar alańnyń kez kelgen bóliginen kórinetin bolady. Al sahnanyń jan-jaǵynda úlken Led-ekrandar turady, osylaısha kórermender shoýdyń barlyq elementterin tamashalaı alady.
Qazaqstannan sharaǵa Tigrahaud, Drums of Almaty etno-rok-toby, qazaqstandyq sahna metrleri Edil Khusainov and Satzhan Project, Nariman Issenov, Roman Bazhanov, Rustam Ospanoff, Arsen SuperFly dıdjeıler qatysady.
Sonymen qosa baǵdarlamada orys halyq shyǵarmashylyǵynyń týyndylary, bashqurt halqynyń dástúrli mýzykasy shyrqalyp, kómeımen án aıtý óneriniń sheberleri ónerlerin ortaǵa salady jáne taǵy da basqa ult ókilderiniń dástúrli áýenderi kórermenge usynylady.
Festıvaldiń sharyqtaý shegi - sheberlerdiń etnıkalyq qalashyǵy bolmaq, onda qoldan jasalǵan kádesyılardy, mýzykalyq aspaptardy, kıimderdi kórýge jáne satyp alýǵa bolady. Qonaqtarǵa yńǵaıly bolýy úshin qoǵamdyq tamaqtaný oryndary uıymdastyrylady.
