Alǵash ret múmkindigi shekteýli sportshylar arasynda konkýrdan jarys ótedi

ASTANA. KAZINFORM - Astana qalasynda alǵash ret múmkindigi shekteýli sportshylar arasynda at sportynyń konkýr túrinen «Astana qalasynyń kýbogy» I ashyq jarysy ótkiziledi.

Jarysqa Astana, Aqtaý, Atyraý, Óskemen, Rıdder qalalarynyń sportshylary qatysady dep kútilýde.

Uıymdastyrýshylardyń aıtýynsha bundaı arnaıy olımpıadalyq baǵdarlamasynyń sportshylary úshin ótetin jarys elorda tórinde alǵash ret ótpek.

«Bizdiń paralımpıadalyq sportshylardyń árqaısysy jeńimpaz ataǵyna laıyq. Jyl saıyn bizdiń qalada parasportty qoldaý sharalary kúsheıip keledi jáne biz osy salany odan ári damytý úshin barlyq qajetti jaǵdaılardy jasaýdy jalǵastyramyz. «Arǵymaq» kesheniniń negizgi baılyǵy – bul kez kelgen deńgeıdegi at sporty boıynsha jarystar ótkizýge múmkindik beretin sport ǵımaraty. Sol sebepti osy sáýir aıynda Astana qalasy ákiminiń kýbogy úshin múmkindigi shekteýli jandar arasynda konkýrdan ashyq birinshilik uıymdastyrylady. Bundaı jarystar Óskemen, Atyraý, Almaty qalalarynda uıymdastyryldy. Degenmen, Astana úshin bul birinshi jáne erekshe jaıt bolmaq» -, deıdi «Arǵymaq» at-sporttyq kesheniniń basshysy Amanjol Hasenov.

Jarystar jeke jáne Arnaıy Olımpıadanyń eki baǵdarlamasy boıynsha ıaǵnı, «Mánerlep júrý», «Jumys joly» baǵdarlamasy aıasynda ótedi. Jarysqa tirek-qozǵalys apparaty zaqymdanǵan, ıntellektiniń damýynda aýytqýy bar 8 jasqa tolǵan múmkindigi shekteýli jandar qatysa alady.

Jarystyń resmı ashylýy 13 sáýir kúni saǵat 10.00-de, «Arǵymaq» at-sporttyq saýyqtyrý kesheniniń manejinde ótedi.