Qazaqstannyń balmuzdaq eksporty alǵash ret ımporttan asyp tústi
ASTANA. KAZINFORM – Aýyl sharýashylyǵy mınıstrligi 2025 jyldyń qorytyndysy boıynsha Qazaqstan alǵash ret balmuzdaqtyń netto-eksporttaýshysy atanǵanyn málimdedi.
Qazaqstan Strategııalyq josparlaý jáne reformalar agenttiginiń Ulttyq statıstıka bıýrosy derekterine sáıkes, byltyr eldegi balmuzdaq óndirisi 63,2 myń tonnaǵa jetip, bir jylda 22%-ǵa ósken. Bul – 2000 jyldardyń basynan bergi eń joǵary kórsetkish.
Jyl qorytyndysy boıynsha balmuzdaq eksporty 36,8%-ǵa artyp, 14,2 myń tonnany quraǵan. Osylaısha eksport kólemi ımporttan asyp tústi.
Qazaqstandyq balmuzdaq negizinen Reseıge, Qyrǵyzstanǵa jáne Ózbekstanǵa eksporttalady. Al ımport kólemi 5,1%-ǵa tómendep, 12,2 myń tonnaǵa deıin qysqarǵan.
Mınıstrlik bul kórsetkish otandyq óndirýshilerdiń ishki jáne syrtqy naryqtaǵy básekege qabilettiliginiń artqanyn kórsetetinin atap ótti.
Bıyl da ósim saqtalǵan. 2026 jyldyń qańtar–naýryz aılarynda balmuzdaq óndirisi 58,6%-ǵa ósip, 14 566 tonnaǵa jetken.
Saladaǵy negizgi eksporttaýshynyń biri – Shin-Line kompanııasy. Kompanııa Qazaqstandaǵy balmuzdaq eksportynyń 95%-yna deıin qamtamasyz etedi.
- Qazirgi tańda Shin-Line TMD elderindegi balmuzdaq óndirýshiler arasynda tórtinshi orynda tur. Ótken jyly kompanııanyń eksport kólemi 14,2 myń tonnaǵa jetip, eksporttyq túsimi 49 mln dollardan asqan. Ónimder Qytaıǵa, Reseıge, Belarýske, Mońǵolııaǵa, Kavkaz elderi men Ortalyq Azııa memleketterine jetkiziledi, - delingen aqparatta.
Mınıstrlik óndiristegi ósimge ınfraqurylymǵa salynǵan ınvestıtsııalar áser etkenin atap ótti. Máselen, Baıserkedegi 50 gektar aýmaqta ornalasqan zamanaýı zaýytqa 64 mlrd teńge ınvestıtsııa salynǵan. Kásiporynda 3500-den astam adam jumys isteıdi.
Sonymen qatar byltyr qazaqstandyq balmuzdaqtyń ortasha eksporttyq baǵasy 1 kelisi úshin 3,47 dollarǵa jetken.
Aıta keteıik, BQO ýnıversıtetinde túıe sútinen balmuzdaq pen ıogýrt jasaý qolǵa alyndy.
