Alǵash ret qazaq dáriger Qytaı Kommýnıstik partııasynyń eń joǵary ordenin aldy
BEIJІŃ. KAZINFORM — 2026 jylǵy 1 shildede Qytaı astanasy Beıjińdegi Halyq jınalysy saraıynda Qytaı Kommýnıstik partııasynyń qurylǵanyna 105 jyl tolýyna arnalǵan saltanatty jıyn ótti, dep habarlaıdy CCTV.
Іs-shara barysynda Qytaı Kommýnıstik partııasy Ortalyq komıtetiniń bas hatshysy, QHR tóraǵasy ári Ortalyq áskerı keńestiń tóraǵasy Sı Tszınpın memleket pen qoǵamnyń damýyna erekshe úles qosqan birqatar tulǵaǵa Qytaı Kommýnıstik partııasynyń eń joǵary marapaty — «1 shilde» ordenin tabystady.
Bıyl atalǵan joǵary marapatqa segiz adam ıe boldy. Olardyń qatarynda qazaq ultynyń ókili, dáriger Oqas Súleımen de bar.
Qytaıdyń resmı buqaralyq aqparat quraldarynyń málimetinshe, Oqas Súleımen shekaralyq óńir turǵyndarynyń densaýlyǵyn qorǵaýǵa ómirin arnaǵan dáriger. Ol 40 jyldan astam ýaqyt boıy at ústinde júrip, dári qobdıshasyn serik etip, aptap ystyq pen qaqaǵan aıazǵa qaramastan jaılaý men kıiz úılerdi aralap, jergilikti halyqqa medıtsınalyq kómek kórsetip keledi.
Oqas Súleımen Qytaıdyń Shyńjań-Uıǵyr avtonomııalyq aýdanyndaǵy Tarbaǵataı aımaǵyna qarasty Sháýeshek óńiriniń Dórbiljin aýdany mal sharýashylyǵy aýrýhanasynda ishki aýrýlar bóliminiń bas dárigeriniń orynbasary bolyp qyzmet atqarǵan. Ol 1975 jyldan beri 100 myńnan astam naýqasty emdep, birneshe myń aýyr haldegi patsıenttiń ómirin saqtap qalýǵa atsalysqan. Sonymen qatar 3200-den astam náresteniń dúnıege kelýine kómektesken.
Aýyldyq densaýlyq saqtaý salasynyń damýyna qosqan erekshe úlesi úshin ol buǵan deıin «Ulttyq densaýlyq saqtaý júıesiniń úzdik qyzmetkeri», «Qytaıdyń 1 mamyr eńbek medali», «Ulttar birligi men progresiniń úzdik qaıratkeri» sııaqty birqatar memlekettik marapatqa ıe bolǵan.
Resmı sıpattamada onyń eńbegi «shekaralyq óńir halqynyń densaýlyǵyn qorǵaǵan aq halatty abzal jannyń dárigerlik izgiligi men partııanyń bastapqy mıssııasyna adaldyǵynyń jarqyn úlgisi» retinde baǵalanǵan.
Aıta keteıik, «1 shilde» ordeni — Qytaı Kommýnıstik partııasynyń eń joǵary partııalyq marapaty. Ol Qytaı Kommýnıstik partııasy Ortalyq komıtetiniń sheshimimen taǵaıyndalyp, marapatty QKP Ortalyq komıtetiniń bas hatshysy tabystaıdy. Orden 2017 jylǵy 22 shildeden bastap qoldanysqa engizilgen jáne, ádette, bes jylda bir ret Qytaıdyń áleýmettik-ekonomıkalyq damýyna erekshe úles qosqan partııa múshelerine beriledi.
Marapat taǵaıyndalǵannan beri oǵan barlyǵy 37 adam ıe boldy. Oqas Súleımen — osy joǵary marapatqa ıe bolǵan alǵashqy qazaq ultynyń ókili.
