Alǵash ret kásibı baǵdar berýge arnalǵan biryńǵaı ádistemelik nusqaýlyq ázirlendi

ASTANA. KAZINFORM — Qazaqstanda alǵash ret kásibı baǵdar berýge arnalǵan biryńǵaı ádistemelik nusqaýlyq ázirlendi. Orta bilim komıteti men Y. Altynsarın atyndaǵy Ulttyq bilim akademııasy daıyndaǵan bul nusqaýlyq barlyq mektepterge taratylyp, 1–11-synyp oqýshylarymen kásibı baǵdar jumysyn júıeli, birizdi jáne túsinikti formatqa kóshirýdi kózdeıdi.

Nusqaýlyq oqýshylardyń qyzyǵýshylyǵyn, eńbek naryǵyndaǵy qazirgi tendentsııalardy eskere otyryp ázirlengen. Ol oqýshylardyń jeke qabiletterin tereńirek tanýyna, qazirgi eńbek naryǵynyń talaptaryn túsinýine jáne bolashaq mamandyqty sanaly tańdaýǵa jol ashady.

Munda mamandarmen kezdesýler, kásiporyndarǵa ekskýrsııalar, kásibı synamalar ótkizý, praktıkalyq tapsyrmalar oryndaý qamtylǵan.
Nusqaýlyqtyń mazmuny «Adal azamat» birtutas tárbıe baǵdarlamasynyń qundylyq negizderimen úılestirilgen. Baǵdarlamadaǵy negizgi qaǵıdattary — eńbekke qurmet, jeke jaýapkershilik, adaldyq, azamattyq belsendilik jáne qoǵamǵa qyzmet etý. Mektepishilik jobalar, volonterlik bastamalar, tálimgerlik jáne kásibı synamalar arqyly oqýshylardyń boıynda kásibı etıkanyń bazalyq normalary, eńbek mádenıeti, qaýipsizdik daǵdylary jáne komandalyq jumys daǵdylary qalyptasady.

Akademııa nusqaýlyqty 1–4, 5–7, 8–9 jáne 10–11-synyp deńgeılerinde kásibı baǵdarlaý jumystaryn josparlaý jáne iske asyrý úshin praktıkalyq qural retinde paıdalaný usynylady. 

Aıta ketelik jaratylystaný baǵytyndaǵy Aýyl olımpıadasynda 200 oqýshy jeńimpaz atanǵan edi.