Alǵash ret eki myńnan astam sarbaz elimizdiń joǵary oqý oryndarynda oqýǵa grant aldy

ASTANA. KAZINFORM – Qorǵanys mınıstrliginde alǵash ret áskerı qyzmettiń belgilengen merziminde qyzmet etken sarbazdarǵa elimizdiń jetekshi joǵary oqý oryndarynda oqýǵa memlekettik granttar tabystaldy. 

Sertıfıkattardy tapsyrý saltanatty jaǵdaıda ótti. Qorǵanys mınıstriniń tárbıe jáne áleýmettik-quqyqtyq jumys jónindegi orynbasary general-maıor Shaıh-Hasan Jazyqbaev jaýyngerlik oqý úzdikterin quttyqtady. Qorǵanys vedomstvosy basshysy orynbasarynyń qolynan 2024 jyldyń kókteminde shaqyrylyp, merzimdi áskerı qyzmetten ótken 22 sarbaz oqý sertıfıkattaryn aldy.

UBT tapsyrmaı, joǵary oqý oryndaryna túsý múmkindigi – merzimdi áskerı qyzmettiń bedelin arttyrýǵa, jas mamandardy qoldaýǵa jáne olardyń kásibı ósýin yntalandyrýǵa baǵyttalǵan memlekettik bastama.

– Konkýrstyq irikteýge Qarýly kúshterdiń, Memlekettik kúzet qyzmetiniń, Tótenshe jaǵdaılar mınıstrliginiń, Ulttyq qaýipsizdik komıteti Shekara qyzmeti men Ulttyq ulannyń áskerı bólimderinde belgilengen merzimde qyzmet etken 17500-den astam sarbaz qatysty. Aralaryńyzda áskerı oqý oryndaryna túsip, ofıtser bolýǵa sheshim qabyldaǵandardyń baryna qýanyshtymyn. Bul armııadaǵy qyzmet jaýapkershilik, tártip jáne patrıotızm sııaqty qasıetterdi qalyptastyrǵanyn bildiredi. Oqýda da, qyzmet etý kezeńinde de joǵary nátıje kórsetetindigińizge kúmánim joq, – dep atap ótti general-maıor Shaıh-Hasan Jazyqbaev.

Mınıstrdiń orynbasary Qorǵanys mınıstrligi merzimdi áskerı qyzmet ótkergen azamattar úshin túrli jeńildikterdi arttyrý jóninde sharalar qabyldaýdy jalǵastyra beretinin jetkizdi.

Ádil jáne ashyq irikteý júrgizý úshin «Sarbaz 2.0» aqparattyq júıesi quryldy. Onda barlyq áskerı bólimder tirkelgen jáne búkil qyzmet kezeńinde sarbazdardyń úlgerimi men tártibi boıynsha nátıjeler kórsetilgen.

Endi keshegi sarbazdar UBT tapsyrmaı, memleket esebinen oqýdan bólek, shákirtaqy alýǵa, tegin jataqhanada turýǵa jáne áskerı kafedraǵa konkýrssyz qabyldanýǵa quqyly.

Ǵylym jáne joǵary bilim mınıstrliginen azamattyq joǵary oqý oryndaryna 2010 grant, Qorǵanys mınıstrliginiń áskerı ınstıtýttaryna 253 oryn, Ulttyq ulan akademııasyna 36 oryn, UQK Shekara qyzmeti akademııasyna 12 oryn jáne Tótenshe jaǵdaılar mınıstrliginiń oqý ornyna 3 oryn bólindi.

QR QK Áýe qorǵanysy kúshteriniń 44813 áskerı bóliminde merzimdi qyzmet ótkergen Vladıslav Vnýkovskıı merzimdi qyzmet áskerı qyzmetshileriniń atynan alǵys sóz sóıledi.

– Qazaqstan Respýblıkasy Qarýly kúshteri qatarynda qyzmet etý men úshin tek batyldyq, tártip pen tózimdilik mektebi ǵana emes, sonymen qatar komandada jumys isteýdi úırenýge baǵa jetpes ýaqyt boldy. Men elimizdiń táýelsizdigi men tutastyǵyn qorǵaýǵa qabiletti, qýatty jáne kásibı armııanyń bir bóligi bolǵanymdy maqtan tutamyn.

Búgin qolyma sertıfıkat alyp, Áýe qorǵanysy kúshteriniń áskerı ınstıtýtyna túsip, ákemniń jolyn qýyp, ofıtser bolý týraly sheshim qabyldadym, – dedi Vladıslav Vnýkovskıı.

Іs-sharaǵa áskerdegi qyzmeti arqasynda jetekshi ýnıversıtetterge túsken elordalyq joǵary oqý oryndarynyń stýdentteri men sarbazdardyń ata-analary qatysty.

Aıta keteıik, sarbazdardyń psıhıkalyq jaǵdaıyn jasandy ıntellektiniń kómegimen anyqtaıdy.