Alǵash ret daýys bergen 18 jastaǵy astanalyqtarǵa syılyq berildi
Saılaýǵa jaýapkershilikpen qaraıtyn jastar «Qazaqstan temir joly» kompanııasynyń ǵımaratynda ornalasqan saılaý ýchaskesine basqa turǵyndarmen birge kelgen. Daýys bergennen keıin olarǵa syılyqtar berildi.
«Tuńǵysh ret daýys berýshiler, sondaı-aq 9 maýsymda týǵan kúnin toılaıtyn jurtqa bul sáttiń mańyzdylyǵyn atap ótý úshin estelik syılyqtar ázirledik. Olardyń arasynda fýtbolka, kepka, kitaptar sekildi zattar bar. Saılaý ýchaskesinde alǵash ret daýys beretin 50-den astam jas tirkelgen», - dedi № 110 ýchaskelik saılaý komıssııasynyń tóraǵasy Darhan Mataev.
S.Seıfýllın atyndaǵy Qazaq agrotehnıkalyq ýnıversıtetiniń stýdenti Aslan Asqardyń týǵan kúni Prezıdent saılaýyna tuspa-tus keldi. Ol búgin osyndaı mańyzdy is-sharaǵa alǵash ret qatysyp qana qoımaı, 18 jasyn toılaıdy.
«Árbir patrıot óz eliniń bolashaǵyna jaýapty. Saılaýda alǵash ret daýys berdim, bul men úshin úlken jaýapkershilik. Alǵa qoıǵan maqsattaryma qol jetkizý úshin jarqyn bolashaǵyma alańdaýlymyn. Al biz sekildi alǵash ret daýys bergen jastarǵa arnaıy tosyn syı jasaldy. Mundaı syılyqtardy alý óte jaqsy, bul bárimizdiń esimizde máńgi qalady», - dep atap ótti Aslan Asqar.
Qoǵamdyq tamaqtaný jáne servıs kolledjiniń stýdenti Jáńgir Nııazbekov óz qurdasynyń pikirin tolyq qoldaıdy.
«Men saılaýda alǵash ret daýys berip turmyn. Árbir adam eldiń bolashaǵy úshin daýys berýi kerek», - deıdi Jáńgir Nııazbekov.
Jastar elordanyń barlyq turǵynyn saılaý ýchaskelerine kelip, azamattyq boryshyn óteýge shaqyrdy.
Esterińizge sala keteıik, saılaý ýchaskeleri óz jumysyn saǵat 20.00-de aıaqtaıdy.
