Alǵash ret adamdardyń túrli-tústi rentgen sýreti jarııalandy

BRıÝSSELЬ. QazAqparat - Jańazelandııalyq ǵalymdar álemde alǵash ret adamnyń úsh ólshemdi túrli-tústi rentgen keskinin túsirdi. Buǵan Eýropa ıadrolyq zertteýler ortalyǵynda (CERN) ázirlengen Medipix3 sensorlyq mıkroshemasynyń arqasynda qol jetkizilgen, dep habarlaıdy «QazAqparat» menshikti tilshisi uıymnyń saıtyna silteme jasap. 

Tústi rentgen keskinderi dárigerlerdiń naýqastarǵa barynsha dál dıagnoz qoıýyna múmkindik beredi.

Medipix fotokamera sııaqty jumys isteıdi. Mıkroshema árbir jekelegen usaq bólshekti «kóredi». Bul óte tunyq keskin túsirýge múmkindik beredi.

Ákeli-balaly Fıl jáne Entonı Batlerler jasaǵan jańa apparat adam denesiniń ártúrli komponentterin, mysaly, ulpalardy, sýdy, sondaı-aq aýrý belgilerin tanıdy.

Buǵan deıin ǵalymdar skanerdi qaterli isikti, súıekter men býyndardyń jaǵdaıyn, júrek ustamasy men ınsýltqa sebep bolatyn qan tamyry aýrýlaryn zertteýge paıdalanyp kelgen bolatyn.

«Júrgizilgen zertteýlerdiń bastapqy nátıjeleri emhanalarda spektraldyq vızýalızatsııany qoldaný barynsha dál dıagnoz qoıý múmkindigin beretinin kórsetip otyr», - deıdi professor Entonı Batler.