Jibek Joly efırinen bastalǵan jobanyń arqasynda 70 otbasy sábıli boldy
ASTANA. KAZINFORM — Bala súıýdi armandaǵan otbasylarǵa qoldaý kórsetý bastamasy alǵash ret 2023 jyly «Jibek Joly» telearnasynda júzege asqan «Ana bolǵym keledi» áleýmettik jobasynan bastaý aldy. Jýrnalıst, qoǵam qaıratkeri, Astana qalalyq máslıhatynyń depýtaty Láılá Sultanqyzy júrgizgen joba aıasynda Jibek Joly telearnasynyń qoldaýymen 15 otbasyǵa kómek kórsetilip, nátıjesinde 13 sábı dúnıege keldi.
Keıin bul bastama júıeli túrde jalǵasyp, «Márııam Qazaqstan» qaıyrymdylyq qorynyń qurylýyna negiz boldy. Búginde qor úsh jyldyq jumysynyń qorytyndysyn jarııalap otyr.
Osy ýaqyt ishinde qordyń qoldaýyna ıe bolǵan 70 otbasynyń 25-i ata-ana atanyp, dúnıege 26 sábı keldi. Qazir taǵy 11 otbasy náreste kútip júr.
Qordyń basty maqsaty — bedeýlik dıagnozymen betpe-bet kelgen qazaqstandyq otbasylarǵa ata-ana bolý jolynda qoldaý kórsetý.
Qor tóraǵasy Láılá Sultanqyzynyń aıtýynsha, uıym qurylǵan kúnnen beri elimizdiń túkpir-túkpirinen eki myńǵa jýyq ótinish kelip túsken.
— Tek 2024 jyly jańa saıt iske qosylǵannan keıin bir jyldyń ishinde 790 anketa qabyldandy. Olardyń arasynan medıtsınalyq kórsetkishter men belgilengen talaptarǵa sáıkes keletin 70 otbasy baǵdarlamaǵa alyndy. Ár ótinishtiń artynda úlken úmit, uzaq kútý men kúrdeli taǵdyr tur, — deıdi Láılá Sultanqyzy.
Qor baǵdarlamasyna qatysýshylardyń jasy ártúrli. Іshki statıstıkaǵa sáıkes, búginde eń jas qatysýshy otbasy — 25 jastaǵy erli-zaıyptylar. Al eń eresek qatysýshylardyń jasy 45-47 aralyǵynda.
Otbasylardy irikteý birneshe kezeńnen turady. Ótinishter aldymen mamandardyń saraptaýynan ótedi. Sońǵy sheshimdi Astanadaǵy ECOMED klınıkasynyń medıtsınalyq dırektory, Qamqorshylyq keńesiniń múshesi Almas Qurmanalıevıch Ibragımov bastaǵan dárigerler toby men qordyń Qamqorshylyq keńesi birlesip qabyldaıdy.
Qamqorshylyq keńesiniń quramynda toǵyz múshe bar. Otbasylardyń qujattaryn reprodýktologtar, andrologtar, ýrologtar, embrıologtar, endokrınologtar jáne psıhologtar qarap, ár jaǵdaıdy jeke talqylaıdy. Osydan keıin ǵana kómek kórsetý týraly túpkilikti sheshim shyǵarylady.
2026 jyldan bastap baǵdarlamaǵa psıhologııalyq súıemeldeý de engizildi. Bul bastama EKO protsedýrasyna daıyndalyp júrgen otbasylarǵa emotsıonaldyq qoldaý kórsetýge baǵyttalǵan.
Búginde qor jumysynyń basty nátıjesi — statıstıka emes, ata-ana ataný baqytyna qol jetkizgen ondaǵan otbasynyń ómirindegi ózgeris.
«Adamnyń bár qyzyǵy bala degen» degen Abaı sózi qor qyzmetiniń ózegine aınalǵan. Úsh jyl ishinde dúnıege kelgen 26 sábı men jaqyn arada ómir esigin ashatyn taǵy 11 náreste — osy mıssııanyń naqty nátıjesi.
«Márııam Qazaqstan» qaıyrymdylyq qory 2023 jylǵy 14 aqpanda jýrnalıst, qoǵam qaıratkeri, Astana qalalyq máslıhatynyń depýtaty Láılá Sultanqyzynyń bastamasymen qurylǵan. Qor bedeýlik dıagnozy qoıylǵan otbasylarǵa EKO baǵdarlamasy arqyly kómek kórsetedi. Baǵdarlama Qazaqstan azamattaryna arnalǵan jáne ashyqtyq pen eseptilik qaǵıdattaryna negizdelgen.
Aıta keteıik, jaqynda Astanada «EKOmamaFEST-2026» otbasylyq festıvali ótti.
