Alǵan jaraqatymnan buryn áriptesimniń qazasy aýyr tıdi - Samat Ospanov
KÓKShETAÝ. QazAqparat - Alǵan jaraqatymnan góri áriptesimniń qazasy aýyr tıdi. Bul týraly búgin Aqmola oblystyq kópbeıindi aýrhanasynda emdelip jatqan qoryqshy, «Ohotzooprom «ÓB» RMQK Ortalyq óńirlik fılıalynyń ınspektory Samat Ospanov jýrnalıstermen suhbat barysynda aıtty, dep habarlaıdy QazAqparat tilshisi.
23 shilde kúni Jarqaıyń aýdanynyń Birsýat aýylyna jaqyn mańda zańsyz kıik atyp júrgen brakonerlerdi toqtatam dep jazym bola jazdaǵan qoryqshynyń sózinshe, oqıǵa qas-qaǵym sátte bolǵan.
«2012 jyldan beri qoryqshy bolyp jumys istep kelemin. Bul joly 15 kúnge issaparǵa keldik. Oqıǵa is-saparymnyń altynshy kúni boldy. Buryn mundaı bolǵan emes, bul joly da olaı bolady dep oılaǵan joqpyn. Brakonerler kezdesken kezde kólikterin qorshap alamyz, sol kezde olar toqtaıtyn edi», - deıdi qoryqshy.
Sonymen qatar, ol búgin jerlengen áriptesi Qanysh Nurtazınovtyń ólimi aýyr tıgenin aıtty.
«Qanysh Nurtazınov ekeýimiz birinshi ret birge jumys istegen edik. Aqjarqyn jigit edi. Búgin jerledi dep estip jatyrmyn. Jatqan jeri jaıly bolsyn. Maǵan alǵan jaraqatymnan góri áriptesimniń qazasy aýyr tıdi», - dep áriptesiniń qazasyna kóńil bildirdi Samat.
Sonymen qatar, ol jýrnalısterdiń «Osy oqıǵadan keıin osy salada odan ári jumys isteısiz be?» degen suraǵyna «Iá» dep jaýap berdi.
Aıta keteıik, Samat pen Aıgúl búginde úsh bala tárbılep otyr. Úlkeni - 18 jasta bolsa, kishisi - 8-de. Budan bólek, Samattyń 67 jastaǵy anasy da otbasymen birge turady. Dárigerlerdiń sózinshe, keler aptada naýqas jazylyp shyǵýy múmkin.
Eske sala keteıik, 23 shildede Aqmola oblysy Jarqaıyń aýdanynda brakonerlerdiń izine túsken eki ınspektorǵa qarsy oq atylyp, saldarynan 1976 jylǵy ınspektor Qanysh Nurtazınov kóz jumdy, al, onyń áriptesi Samat Ospanov jaralanyp, aýrýhanaǵa jatqyzylǵan edi. Búgin QR Ekologııa, geologııa jáne tabıǵı resýrstar mınıstri Maǵzum Myrzaǵalıev Aqmola oblystyq kópbeıindi aýrýhanasynda emdelip jatqan qoryqshy Samat Ospanovtyń jaı-kúıin bilip, oǵan ІІ dárejeli «Aıbyn» ordenin tabys etti.
