Alǵada týǵan arý álemdik jobalardy atqaryp júr
ASTANA. KAZINFORM — Aqtóbe oblysynyń shaǵyn ǵana Alǵa qalasynan shyqqan qazaq qyzy búginde AQSh, Aýstralııa, Túrkııa, Ulybrıtanııa sekildi alpaýyt elderdiń ınjenerlik jobalarynda óz qoltańbasyn qaldyryp keledi.
Ol – qujat júrgizýdiń qatań tártibi men sapa menedjmentiniń talaptaryn bes tilde erkin meńgergen, óndiristik ortadaǵy kásibıligimen moıyndalǵan maman. Egıpet astanasy Kaırde turyp jatqan Ásel Jolmanova agenttik tilshisine óziniń shynaıy tabys tarıhyn, qıyndyq pen múmkindik qatar órilgen kásibı jolyn, armany men azaby qatar júrgen kúnderin ashyq aıtyp berdi.
Qarapaıym muǵalimnen — halyqaralyq mamanǵa deıin
– Ásel, búginde sizdi álemdik jobalarda jumys isteıtin bilikti maman retinde bilemiz. Al kásibı jolyńyzdyń bastaýy tym qarapaıym ustazdyqtan bastalǵan eken. Sol alǵashqy qadamdaryńyz týraly aıtyp berseńiz.
– Iá, meniń eńbek jolym Aqtóbedegi Jubanov ýnıversıtetinen bastaldy. Ol kezde meniń jalǵyz maqsatym – jaqsy muǵalim bolý edi. Anam: «Sen til úırenýge beıimsiń, sabyrlysyń, balamen jumys isteýge jaraısyń» dedi. Men de senip, muǵalimdik mamandyqqa oqýǵa tústim. Biraq óz júregimde árdaıym sheteldik ortaǵa, aýqymdy jobalarǵa degen umtylys boldy. Til biletinimmen, ózimdi bir orynda toqtap qalǵandaı sezindim.
Mektep pen til ortalyǵynda júrgenimde, ishimde «taǵy ne isteı alamyn?» degen suraq ketpeı turatyn. Aqyry, bir kúni bárin tastap, sheteldik kompanııaǵa túıindeme joldadym. Bul ómirimdegi alǵashqy úlken táýekel edi.
– Sol táýekeldiń sońy sizdi Teńiz ken ornyna alyp keldi ǵoı, ıá?
– Iá, dál solaı. Qolymda pedagog dıplomym bar jas qyz edim. Biraq Teńizge aǵylshyn tilin úıretýshi retinde shaqyryldym. Al ol jaqta bári basqa –qaýipsizdik tehnıkasy, jumys tártibi, ishki mádenıet, qujatqa degen uqyptylyq. Ras, alǵashynda qoryqtym. Biraq ár sát meni shyńdaı berdi. Sol óndiriste júrip men óndiristik protsestiń ishinde bolǵym keletinin uqtym.
Keńsege emes, júıege úles qosqym keldi.
«Tehnık maman bolý – men úshin tańdaý emes, qajettilik edi»
– Siz tek ákimshilik qyzmettermen shektelmeı, tehnıkalyq pozıtsııaǵa deıin kóterilgenińizdi bilemiz. Qaıta oqýǵa barýǵa ne ıtermeledi?
– Bir kúni maǵan qaratyp: «Sen tek aýdarmashy ǵanasyń ǵoı» degen sóz aıtyldy. Osy sóz júregime tiken bolyp qadaldy. Sebebi, men sol sátte ǵana emes, burynnan beri óndiristik protsesterdiń tereńine boılaǵym keletinin sezip júrgenmin. Tek maman retinde moıyndalǵym keldi. Aýdarǵan qujatty ózimniń de túsinip, sapasyn teksere alatyn deńgeıge jetkim keldi.
Sóıtip, Almatyǵa attanyp, Sátbaev atyndaǵy ýnıversıtetke oqýǵa tústim. Qurylys ınjeneri degen aty aýyrlaý bolǵanymen, júregime jaqyn boldy.
Qos dıplom alǵannan keıin ǵana meni naǵyz ınjenerlik ortada seriktes retinde qabyldaı bastady. Bul — meniń eń mańyzdy kásibı jeńisterimniń biri.
– Óndiristik ortada er adamdardyń úlesi joǵary. Áıel retinde kedergi kóp bolǵan shyǵar?
– Iá, árıne. Basynda «bul áıel kóp júrmeıdi», «mundaı sala názik janǵa aýyr» degen pikirler aıtyldy. Keıde, tipti tehnıkalyq jınalysta aıtqan pikirimdi elemeýge tyrysatyndar boldy. Biraq ýaqyt óte kásibılik bárinen bıik turatynyn dáleldedim. Árbir esep, árbir qujat, árbir merzim – meniń eńbegim. Jynys emes, nátıje sóıleıtinin kórsettim. Qazir sol salanyń ishinde meniń pikirim elenedi, keńesim suralady.
Bul – kúndelikti kúres pen tabandylyqtyń jemisi.
«Jetistik — statıstıka emes, erik pen eńbek»
– Siz kásibı salada naqty nátıjelerge jetkenińizdi ashyq aıtyp júrsiz. Sol jetistikterdiń astarynda ne tur?
– Bir qaraǵanda, bári sandar sııaqty: 5000 ınjenerlik qujat, 1000 betten astam tehnıkalyq aýdarma, qujat bekitý protsesin 20 paıyzǵa jedeldetý, sáıkessizdikterdi 15 paıyzǵa azaıtý...
Biraq bul sandardyń artynda myńdaǵan saǵattyq eńbek, úzilissiz oqý, ýaqytpen sanaspaıtyn túnder, ishki qysym men jaýapkershilik bar.
Ár joba – meniń ishki ósýimniń aınasy. Árbir qıyn tapsyrma – meniń kásibı kelbetimniń bir kirpishi.
– Qazir qaıda turyp, kimdermen jumys istep júrsiz?
– Qazir Kaır qalasynda turamyn. Egıpet — mádenıeti, mentalıteti, tili bólek el. Biraq bul el meniń kásibı shekaramdy keńeıtip, jańa ortada da óz ornymdy tabýǵa múmkindik berdi.
AQSh, Aýstralııa, Ulybrıtanııa, Túrkııa memleketteriniń kompanııalarymen jumys istep júrmin.
Facebook-taǵy dostarymnyń geografııasy da keń: London, Hıýston, Ystanbul, Kaır...
Keıde ózim de tańǵalamyn: Alǵanyń kishkentaı kóshesinen shyǵyp, álemdik jobalardyń bir bólshegine aınalamyn dep kim oılaǵan?!
«Basqalarǵa shabyt berý – meniń paryzym»
– Bizdiń bilýimizshe, siz kásibı qyzmetten bólek, áleýmettik jobalarǵa da atsalysyp júrsiz...
– Iá. Bul men úshin óte mańyzdy. Máselen, P.L.A.P. jobasy arqyly jastarǵa til úırenýge, óz bolashaǵyn kásibı turǵyda durys baǵyttaýǵa kómektestim. Bul meniń qoǵamǵa qaıtaratyn qaryzym desem de qatelespeımin.
Men jalǵyz emes ekenimdi bilemin. Men sekildi aýyldan shyqqan, armany bıik ul-qyzdar kóp. Olarǵa tek senim jetispeıdi. Al men olarǵa senim syılaǵym keledi.
– Sońǵysaýalymyz, ómir jolyna endi qadam basqan jas qyz-jigitterge ne aıtasyz?
– Armandaýdan qoryqpańyz. Armannyń shekarasy joq. Biraq sol arman úshin kún saıyn áreket etý kerek. Ózińe sen, bilimge umtyl, ózińe ınvestıtsııa jasa.
Bastapqyda bári qorqynyshty kórinedi. Biraq sol qorqynyshtyń arǵy jaǵynda naǵyz ósý jatyr.
Men óz jolymdy dál osylaı taptym. Alǵa degen kishkentaı qaladan álemdik jobaǵa jetýge bolatynyn dáleldedim. Demek, siz de qol jetkize alasyz.
– Áńgimeńizge rahmet!