«Alǵabastaǵy» apatty úıdiń turǵyndary 1 sáýirde jańa páterlerine qonystanatyn boldy
ALMATY. QazAqparat - Almatydaǵy «Alǵabas» yqshamaýdanynda qulaǵaly turǵan 72 páterli úıdiń turǵyndary úshin jańadan salynǵan kópqabatty úı 2017 jyldyń 1 sáýirinde paıdalanýǵa beriledi.
Bul týraly Almaty qalalyq Qurylys basqarmasynyń basshysy Muhamedǵarip Qurmanǵalıev aıtty, dep habarlaıdy QazAqparat tilshisi.
««Alǵabas» shaǵynaýdanynda jańadan salynyp jatqan turǵyn úıdiń qurylys jumystary aıaqtalyp qaldy, 1 sáýir kúni úı paıdalanýǵa beriledi. Úıdiń sapasyn Sáýlet qurylys baqylaý basqarmasy mamandary, Qoǵamdyq keńes jáne eski úıdiń turǵyndary tarapynan qurylǵan erkin top qadaǵalady. Qosymsha jobaǵa baılanysty úıdi salý ýaqyty sozyldy. Qurylysty merdiger kompanııa «Astana-Qurylys» JShS óz qarajatyna saldy. Úıdiń jospary aldyndaǵy qulaǵaly turǵan úıdiń josparymen birdeı, ıaǵnı, 72 páterli úı. Injenerlik jumystary aıaqtaldy, gaz qubyry júrgizilip jatyr», dedi basqarma basshysy.
Sonymen qatar, ol jýrnalısterge bergen suhbatynda turǵyndardyń arendalyq tólemi boıynsha jańa úıde eshqandaı da ózgeris bolmaıtynyn aıtty.
«Jańa úı salynyp jatqan ýaqytta turǵyndardyń arendalyq jalǵa alý qunyn merdiger kompanııa ózi tólep turdy. Sondaı-aq, kompanııa endi turǵyndardyń kóshý jumystaryna da kómektesedi. Jańa úı kommýnaldyq menshikke ótedi», dedi M.Qurmanǵalıev.
Sózinde Almaty qalalyq Qurylys basqarmasynyń basshysy Muhamedǵarip Qurmanǵalıev qulaǵaly turǵan 136 úıge merdiger kompanııa tolyǵymen qalpyna keltirý jumystaryn júrgizip jatqanyn aıtty. Endi qalǵan ishki jóndeý jumystary aıaqtalǵannan keıin, komıssııa úıdi qabyldap, kommýnaldyq menshikke ótkizedi.
Muhamedǵarip Qurmanǵalıev «Alǵabas» yqshamaýdanynda qulaǵaly turǵan úı daýyna baılanysty tehnıkalyq qadaǵalaýshy mamandar attestattarynan aıyrylǵanyn jáne jobalaýshy uıymdar zańǵa sáıkes jazalanǵanyn jetkizdi.
Eske sala keteıik, Almaty qalalyq Qurylys basqarmasynyń basshysy Muhamedǵarip Qurmanǵalıev 2016 jyldyń jeltoqsan aıynda 2017 jyly «Alǵabas» yqshamaaýdandaǵy zardap shekken №1/136 úıdiń turǵyndary «qonys toıyn» toılaıtynyn aıtqan bolatyn.
