Alǵabas aýylynda koronavırýs juqtyrý oqıǵasy kóbeıdi - Qaraǵandy oblysy

QARAǴANDY. QazAqparat – Aǵymdaǵy jyldyń 28 naýryzy men 4 sáýiri aralyǵynda Qaraǵandy oblysy Ulytaý aýdany Alǵabas aýylynda COVID-19 juqtyrýdyń 34 oqıǵasy tirkeldi. Koronavırýs juqtyrǵandar Jezqazǵan men Sátbaev qalalarynyń ınfektsııalyq aýrýhanalaryna jetkizildi, dep habarlaıdy QazAqparat.

Qaraǵandy oblysynyń sanıtarııalyq-epıdemıologııalyq baqylaý departamentiniń aqparatynsha, aýdan ortalyǵynan 90 shaqyrym jerde ornalasqan Alǵabas aýylynda 250-den astam adam turady. Densaýlyq saqtaý basqarmasy mamandary epıdemııaǵa qarsy sharalardy júrgizý maqsatynda Alǵabas aýylyna baryp, koronavırýs juqtyrǵandarmen baılanysta bolǵan adamdardy anyqtap, qazirgi kezde aýrýdyń taralýyn tejeý maqsatynda tıisti sharalar júrgizýde.

Turǵyndar ishinde alǵashqy bolyp, basqa jerge baryp kelgen áıel aýyrǵan. Ulytaý aýdanynyń sanıtarııalyq-epıdemıologııalyq baqylaý basqarmasynyń qaýlysy boıynsha sanıtarııalyq beket qoıylyp, mektep oqýshylary 18 sáýirge deıin qashyqtan oqýǵa jiberildi. Koronavırýstyń 13 oshaǵy belgilenip, juqtyrǵandarmen baılanysta bolǵan 20 adam anyqtalǵan. Epıdemııaǵa qarsy sharalar jalǵasýda.