Jańa maýsym men úshin sátti bastaldy – Aleksandr Býblık

ASTANA. KAZINFORM – Qazaqstannyń birinshi, álemniń 11-raketkasy Aleksandr Býblık Gonkong ATP 250 týrnırindegi jeńisinen keıin pikir bildirdi, dep habarlaıdy Kazinform tilshisi. 

Qazaqstandyq tennısshi fınalda álemniń 7-raketkasy, ıtalııalyq Lorentso Mýzettıdi qapy qaldyryp, chempıon atandy.

Osydan keıin dúısenbide jańartylatyn ATP reıtıngisinde A.Býblık 10-orynǵa kóteriledi. Bul qazaqstandyq erler arasynda eń úzdik kórsetkish bolmaq. Mýzettı de alǵash ret TOP-5-ke enedi. 

– Jańa maýsymdaǵy basty maqsatym TOP-10-ǵa kirý edi, muny men birinshi aptada-aq oryndadym. Eger muny bireý ótken jyly sáýirde aıtsa, senbes edim, - dedi Býblık oıynnan soń. 

Qazaqstandyq tennısshiniń sózine qaraǵanda, Lorentsony fınalda jeńý – ońaı dúnıe emes.

– Ol 2025 jyly tamasha maýsym ótkizip, jańa jyldy sátti bastady. Men ózime berilgen barlyq múmkindikti paıdalandym. Komandammen birge oılastyrǵan oıyn men taktıkany júzege asyrýǵa qol jetkizgenime qýanyshtymyn. Match barysynda da ózgerister engizýge týra keldi, - dedi Býblık.

Onyń aıtýynsha, byltyr jyl basynda reıtıngide 80-orynǵa deıin quldyraýy oǵan tezirek es jııýǵa sebep bolǵan. Osydan keıin tennısshini sporttyq mansaby men jattyǵý tásiline, jumys barysyna jańasha qaraı bastaǵan. 

– Reıtıngide tómendegennen keıin birdeńeniń durys emes ekenin túsindim. Kóbirek oınap, bosańsymaýdyń keregin sezdim. Mine, sol betburystyń arqasynda osyndaı nátıjege qol jetkizdik. Endi osynyń bárin oı eleginen ótkizip, komandammen aqyldasyp, kelesi meje qandaı ekenin aıqyndaý qajet, - dep tolyqtyrdy sózin tennısshi. 

Aleksandr Býblık Gonkong týrnırinde 106 460 AQSh dollary kóleminde tabys taýyp, 250 reıtıngilik upaıǵa ıe boldy.

Eske sala keteıik, budan buryn Aleksandr Býblıktiń Gonkong týrnırinde top jarǵanyn jazǵan edik. 

Sondaı-aq Aleksandr Shevchenko Aýstralııadaǵy jarysty jeńispen bastady.